Joriy yilning 4-dekabr kuni Jahon iqtisodiyoti va diplomatiya universitetida “Kasbiy muloqotda xorijiy til” mavzusida xalqaro ilmiy-amaliy konferensiya bo‘lib o‘tdi.

JIDU “Sharq tillari” kafedrasi tomonidan tashkil etilgan anjumanda O‘zbekistondagi oliy o‘quv yurtlari, xorijiy oliy o‘quv yurtlari professor-o‘qituvchilari, magistrantlar va chet tillarini o‘qitish yo‘nalishida ilmiy izlanish olib borayotgan ekspertlar ishtirok etdi.

Anjumanning ochilishida JIDU ilmiy ishlar va innovatsiyalar bo‘yicha prorektor, yuridik fanlar doktori, professor Gulnoza Ismailova ishtirokchilarga tabrik so‘zi bilan murojaat qildi.

Konferensiya doirasida O‘zbekiston Respublikasi Tashqi ishlar vazirligi vakillari, JICA va KOICA vakillari so‘zga chiqdi.

Konferensiya uchta seksiya shaklida davom etdi: Chet tillarni kasbiy yo‘naltirilgan o‘qitish nazariyasi va amaliyoti: davr muammolari; Kasbiy muloqotni shakllantirishda tarjima nazariyasi va amaliyoti masalalari; Til, madaniyat va madaniyatlararo muloqot.

Anjuman ishtirokchilari oliy taʼlim muassasalarida chet tillarini oʻrganish va oʻqitish bilan bogʻliq dolzarb masalalarni muhokama qildilar, shuningdek, professional muloqot sohasidagi zamonaviy tendentsiyalarni hisobga olgan holda oʻquv jarayonini modernizatsiya qilish va optimallashtirishning asosiy yondashuvlari haqida soʻz yuritdilar.

Konferensiya yakunlari bo‘yicha “Kasbiy muloqotda chet tili” maqolalar to‘plamini elektron shaklda chop etish rejalashtirilgan.