Jahon iqtisodiyoti va diplomatiya universiteti Xalqaro huquq fakulteti talabalari 2026-yilda ilmiy, akademik, sport va jamoat faoliyatida qator muvaffaqiyatlarga erishib, universitetimiz nufuzini munosib namoyon etmoqdalar. Fakultetimiz 1-bosqich talabasi, Toshkent shahar terma jamoasi a’zosi Abdulhamidova Nilufar Lochinbekovna «U-21 Qo‘mondonlik kubogi» o‘q otish musobaqasida faxrli 1-o‘rinni egalladi. 2-bosqich talabasi Madatov Saloxiddin «Huquq va Burch» jurnalida fuqarolarning axborot xavfsizligiga bag‘ishlangan ilmiy maqolasini chop ettirdi. Shu bosqich talabalari Bocharov Emirxan Temurovich va Xotamov Ulug‘bek Umrbek o‘g‘li Toshkent davlat yuridik universitetida o‘tkazilgan ilmiy-amaliy konferensiyada faol qatnashdilar. Konferensiyada Bocharov Emirxan Temurovich «Best Speaker» nominatsiyasi bilan taqdirlandi. Universitetimizning yana bitta faol talabasi Aliyev Asilbek Bahromovich Rossiyaning Krasnoyarsk shahrida 27-sentabrdan 2-oktabrgacha o‘tkazilgan moliyaviy xavfsizlik bo‘yicha xalqaro olimpiadada “Yurisprudensiya” yo‘nalishi bo‘yicha faxrli 2-o‘rinni qo‘lga kiritdi. 45 davlatdan 700 nafardan ortiq talaba ishtirok etgan ushbu musobaqada erishilgan natija bilan talabamizni, uning ota-onasi hamda ilmiy rahbari — JIDU o‘qituvchisi Uzakbayeva Naubaxar Baxadirovnani samimiy tabriklaymiz. Fakultetning 4-bosqich talabasi Rajabova E’zoza 9–11-oktabr kunlari Turkiyaning Kocaeli shahrida “Türk Dünyası Gençlik Buluşması” xalqaro tadbirida O‘zbekiston va JIDU nomidan ishtirok etdi. Tadbir doirasida u O‘zbekistonning Istanbul shahridagi Bosh konsuli Sherzod Shuhratovich Abdunazarov hamda Turkiyaning AK Parti raisi o‘rinbosari — Prof. Dr. Kürşad Zorlu bilan muloqot qilib, ikki davlat o‘rtasidagi diplomatik hamkorlik, mushtarak qadriyatlar va yoshlarning xalqaro aloqalardagi o‘rni yuzasidan fikr almashdi. 16-oktabr kuni JIDUda AQShning Penn State Dickinson Law huquq maktabi vakili Stiven Barns (Stephen Barnes) ishtirokida mahorat darsi tashkil etildi. Talabalar AQShda hokimiyatlar bo‘linishi tamoyili, Oliy sud qarorlari, LL.M. magistratura dasturlari va xalqaro stipendiya imkoniyatlari bilan tanishib, xalqaro huquqiy bilimlarini kengaytirdilar. 15-oktabr kuni «Yosh siyosatchilar» marafonida JIDUning bakalavriat va magistratura bosqichlarida tahsil olayotgan Yoshlar parlamenti a’zolari faol qatnashib, dolzarb siyosiy, ijtimoiy va iqtisodiy masalalar yuzasidan o‘z fikr va tashabbuslarini ilgari surdilar. Shuningdek, 2026/2027-o‘quv yili uchun Rektor stipendiyasi tanlovida Xalqaro huquq fakulteti talabalari Qurbonov Shahruz Anvar o‘g‘li, Alijonov Asrorbek Adhamjon o‘g‘li va Davlatova Kamola Xolmurod qizi stipendiya sohiblari bo‘ldilar. Ushbu e’tirof ularning akademik natijalari, ilmiy izlanishlari va universitet hayotidagi faolligining munosib samarasidir. Talabalarimizning yutuqlari bilimga intilish, izchil mehnat va tashabbuskorlikning yorqin namunasidir. Barcha talabalarimizni, ularning ustozlari va ilmiy rahbarlarini samimiy tabriklaymiz hamda kelgusidagi ilmiy, akademik, sport va kasbiy faoliyatlarida yangi zafarlar tilaymiz!
Jahon iqtisodiyoti va diplomatiya universitetida talaba-yoshlarni kitob mutolaasiga keng jalb etish, ularning badiiy savodxonligi va kitobxonlik madaniyatini oshirish, shuningdek, yosh avlodni vatanparvarlik va yurtimiz kelajagiga daxldorlik ruhida tarbiyalash maqsadida “Ma’rifat ulashib” loyihasi doirasida adiblar hamda talabalar ishtirokida ijodiy uchrashuv tashkil etildi. Uchrashuvda O‘zbekiston Yozuvchilar uyushmasi a’zolari — Mehri Abdurahmonova, Shodi Otamurod va Asror Mo‘minov ishtirok etib, talaba-yoshlar bilan adabiyot, ijod, kitobxonlik va ma’naviyatning inson hayotidagi o‘rni xususida suhbatlashdilar. Muloqot davomida badiiy adabiyotning yoshlar dunyoqarashini kengaytirish, ularning tafakkuri va nutq madaniyatini rivojlantirish, ezgu qadriyatlar hamda milliy o‘zlikni anglashdagi ahamiyatiga alohida e’tibor qaratildi. Ijodkorlar o‘zlarining hayotiy va ijodiy tajribalari bilan o‘rtoqlashib, kitob mutolaasiga bo‘lgan qiziqishni oshirish, muntazam o‘qish va o‘qilgan asarlar ustida fikr yuritish yuzasidan tavsiyalar berdilar. Samimiy va mazmunli muloqot davomida talabalar o‘zlarini qiziqtirgan savollar bilan murojaat qilish, adiblar bilan fikr almashish hamda ijodkorlarning qarashlari va tajribalaridan bahramand bo‘lish imkoniga ega bo‘ldilar. Bunday uchrashuvlar yoshlarning ma’naviy-intellektual salohiyatini yuksaltirish, kitobxonlik madaniyatini rivojlantirish, milliy adabiyotimizga bo‘lgan qiziqishini kuchaytirish hamda ularni yurt taqdiriga daxldor, faol va vatanparvar insonlar etib tarbiyalashda muhim ahamiyat kasb etadi.
2026-yil 29-oktabr kuni taniqli diplomat va jurnalist Abror G‘ulomov Jahon iqtisodiyoti va diplomatiya universitetining Siyosatshunoslik fakultetida “Siyosat va OAV” fanini o‘rganayotgan 2-bosqich talabalari uchun mahorat darsi o‘tkazdi. A. G‘ulomov Milliy universitetning jurnalistika fakultetini tamomlaganidan so‘ng boshlangan kasbiy faoliyati haqida so‘zlab berdi. U “Toshkent haqiqati” gazetasidagi faoliyati, Madaniyat vazirligi matbuot xizmatidagi mehnat faoliyati, keyinchalik O‘zbekiston Respublikasi Prezidenti devonidagi mas’uliyatli faoliyati hamda mamlakat Tashqi ishlar vazirligidagi qariyb 25 yillik xizmat faoliyati haqidagi xotiralari bilan o‘rtoqlashdi. U Tashqi ishlar vazirligi huzuridagi “Jahon” (hozirgi “Dunyo”) axborot agentligining tashkil etilishida faol ishtirok etgan, o‘n yildan ortiq vaqt davomida O‘zbekistonning Istanbul shahridagi Bosh konsulxonasiga rahbarlik qilgan, shuningdek, O‘zbekiston Milliy axborot agentligi (O‘zA)ning xalqaro bo‘limida faoliyat yuritgan. Talabalar bilan uchrashuv davomida tajribali jurnalist va diplomat O‘zbekistonning xalqaro maydondagi ijobiy imijini ilgari surish maqsadida mahalliy va xorijiy ommaviy axborot vositalari bilan hamkorlik qilish borasidagi tajribasi haqida so‘zlab berdi. U dunyoning yetakchi ommaviy axborot vositalari bilan qanday aloqalar o‘rnatgani, shuningdek, mustaqillikka endigina erishgan mamlakatga qarshi qaratilgan axborot kampaniyalariga qarshi kurashish bo‘yicha olib borgan faoliyati bilan o‘rtoqlashdi. Diplomat Turkiya ommaviy axborot vositalari faoliyatining o‘ziga xos xususiyatlari haqida ham batafsil fikr bildirdi. Uchrashuv yakunida A. G‘ulomov so‘nggi o‘n yil davomida ommaviy axborot vositalari sohasida yuz bergan keng ko‘lamli o‘zgarishlarga alohida to‘xtalib, bugungi kunda dunyoning yetakchi nashrlarida keng yoritilayotgan Yangi O‘zbekistonning zamonaviy qiyofasi haqida so‘z yuritdi. Mahorat darsi yakunida A. G‘ulomov talabalarning ommaviy axborot vositalarining xalqaro munosabatlar va jahon siyosatidagi o‘rniga oid ko‘plab savollariga javob berdi.
Joriy yilning 30-oktabr kuni Toshkent shahri Mirzo Ulug‘bek tumanidagi 35-sonli umumiy o‘rta ta’lim maktabida “Ma’rifat ulashib” loyihasi doirasida yuqori saviyadagi ma’naviy-ma’rifiy hamda ijodiy uchrashuv bo‘lib o‘tdi. Mazkur tadbir Jahon iqtisodiyoti va diplomatiya universiteti, O‘zbekiston Yozuvchilar uyushmasi hamda 35-sonli umumiy o‘rta ta’lim maktabi hamkorligida tashkil etilib, o‘sib kelayotgan yosh avlodning kitobxonlik madaniyatini oshirish, fan va adabiyotga bo‘lgan qiziqishini rag‘batlantirish hamda ularni kasbga to‘g‘ri yo‘naltirish maqsadiga qaratildi. Tadbirni kirish so‘zi bilan Mirzo Ulug‘bek tumani 35-sonli umumiy o‘rta ta’lim maktabi direktori Muqaddas Sharipova ochib berdi. U o‘z nutqida yoshlar ma’naviyatini yuksaltirishda kitob va ta’limning o‘rni beqiyos ekanligini ta’kidlab, oliy ta’lim muassasasi vakillari va ijodkorlar bilan hamkorlikda o‘tkazilayotgan bunday uchrashuvlar o‘quvchilar kelajagi uchun muhim poydevor bo‘lishini e’tirof etdi. Uchrashuvda taklif etilgan mehmonlar, xususan, O‘zbekiston Yozuvchilar uyushmasi a’zosi, shoir, jurnalist va tarjimon - Shodi Otamurod maktab o‘quvchilarga adabiyotning inson ruhiyati va dunyoqarashini shakllantirishdagi ahamiyati, badiiy mutolaaning afzalliklari va ijodiy fikrlash sirlari haqida to‘xtalib o‘tdi. U o‘zining hayotiy va ijodiy tajribalaridan kelib chiqib, yoshlarga doimo izlanishda bo‘lishni va kitob bilan hamnafas yashashni tavsiya etdi. JIDU Xalqaro huquq fakulteti dekan muovini - Farrux Tashev o‘z nutqida zamonaviy ta’lim imkoniyatlari, Oliy ta’lim muassasalariga kirish tayyorgarligi hamda xalqaro huquq sohasidagi zamonaviy talablar haqida atroflicha ma’lumot berdi. Shuningdek, JIDU Xalqaro huquq fakulteti kurs koordinatori Abbosjon Nasimjonov o‘quvchilar uchun Universitetdagi ta’lim jarayoni, talabalik hayoti va katta hayotga birinchi qadamlarni qo‘yishda e’tibor berish lozim bo‘lgan muhim omillar haqida qimmatli maslahatlari bilan o‘rtoqlashdi. Tadbir davomida maktab o‘quvchilari o‘zlarini qiziqtirgan savollarga soha mutaxassislari va ijodkorlardan batafsil javoblar olishdi. Erkin va samimiy ruhda o‘tgan muloqot yoshlarda kelajak kasbini tanlash va oliy ta’limga puxta tayyorgarlik ko‘rish uchun katta motivatsiya bag‘ishladi. Yakunda tashkilotchilar va mehmonlar o‘rtasida kelgusida ham bunday ma’rifiy loyihalar hamkorligini izchil davom ettirishga kelshib olindi.
Jahon iqtisodiyoti va diplomatiya universiteti Yuridik klinikasida Mirzo Ulug‘bek tumani jinoyat ishlari bo‘yicha sudining sayyor sud majlislari bo‘lib o‘tdi. Mazkur tadbir talabalarning nazariy bilimlarini amaliyot bilan mustahkamlash, kasbiy ko‘nikmalarini rivojlantirish hamda huquqiy madaniyatini yuksaltirish maqsadida tashkil etildi. Sud majlislarida universitet professor-o‘qituvchilari va talabalari, sudyalar, tuman prokurori yordamchisi hamda ichki ishlar organlarining mas’ul xodimlari ishtirok etdi. Sayyor sud majlislari davomida giyohvandlik vositalari bilan bog‘liq huquqbuzarliklar, soliq qonunchiligi buzilishi, yo‘l harakati xavfsizligi qoidalariga rioya etmaslik hamda ma’muriy va jinoiy javobgarlikka oid ishlar ko‘rib chiqildi. Talabalar sud jarayonlarini bevosita kuzatish, protsessual tartib-taomillar bilan yaqindan tanishish hamda huquqni qo‘llash amaliyoti bo‘yicha bilimlarini mustahkamlash imkoniyatiga ega bo‘ldilar. Shuningdek, tadbir davomida yoshlar o‘rtasida huquqbuzarlik va jinoyatchilikning oldini olish, ularning huquqiy ongi va madaniyatini oshirish masalalariga alohida e’tibor qaratildi. Mutaxassislar tomonidan huquqbuzarliklarning kelib chiqish sabablari tahlil qilinib, ularning profilaktikasi yuzasidan amaliy tavsiyalar berildi. Ma’lumot uchun: Klinikada talabalar nazariy bilimlarini amaliy mashg‘ulotlar, treninglar va tajribali professor-o‘qituvchilar hamda huquqshunoslar ishtirokidagi o‘quv jarayonlari orqali mustahkamlab kelmoqda. Faoliyati davomida klinikaning o‘quv-amaliy dasturlarida mingga yaqin talaba ishtirok etgan. Shuningdek, minglab ijtimoiy himoyaga muhtoj fuqarolarga bepul huquqiy maslahat va tavsiyalar berilgan. Bugungi kunda universitetning Xalqaro huquq fakulteti 2-bosqichida tahsil olayotgan yuz nafarga yaqin talaba Yuridik klinika doirasidagi amaliy mashg‘ulotlar va treninglarda faol qatnashib, bo‘lajak kasbiy faoliyati uchun zarur bilim va ko‘nikmalarni egallamoqda. Mazkur sayyor sud majlislari universitetda amaliy va dual ta’lim elementlarini rivojlantirish, ta’lim jarayonini sud-huquq amaliyoti bilan uzviy bog‘lash hamda bo‘lajak huquqshunoslarning kasbiy tayyorgarligini oshirishga xizmat qildi.
2026-yil 29-oktabr kuni Jahon iqtisodiyoti va diplomatiya universitetida O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyevning Yevropa qo‘shnichilik kengashi (European Neighbourhood Council — ENC) ijrochi direktori Samuel Doveri Vesterbye bilan uchrashuvi bo‘lib o‘tdi. Uchrashuv davomida tomonlar Markaziy Osiyo va Yevropa Ittifoqi o‘rtasidagi munosabatlarning bugungi holati hamda rivojlanish istiqbollari yuzasidan fikr almashdilar. Siyosiy va iqtisodiy hamkorlikni yanada chuqurlashtirish, mintaqalararo aloqalarni kengaytirish hamda strategik sheriklikni mustahkamlash masalalariga alohida e’tibor qaratildi. Muhokamalarning asosiy mavzularidan biri Markaziy Osiyo va Yevropa o‘rtasidagi transport-logistika bog‘liqligini mustahkamlashga xizmat qiluvchi muhim yo‘nalish sifatida O‘rta koridorni rivojlantirish masalasi bo‘ldi. Uchrashuv ishtirokchilari mazkur yo‘nalishning savdo-iqtisodiy aloqalarni kengaytirish, transport yo‘nalishlarini diversifikatsiya qilish va xalqaro tranzit hamkorligini rivojlantirishdagi salohiyatini ko‘rib chiqdilar. Shuningdek, ta’lim hamda ilmiy-tahliliy sohalardagi hamkorlik istiqbollariga alohida e’tibor qaratildi. Xususan, tomonlar Yevropa Ittifoqi va Markaziy Osiyo o‘rtasidagi munosabatlarga bag‘ishlangan Executive Education qo‘shma ta’lim dasturini ishlab chiqish tashabbusini muhokama qildilar. Mazkur dasturni manfaatdor akademik institutlar, tahlil markazlari va boshqa ixtisoslashgan tashkilotlarni jalb etgan holda amalga oshirish ko‘zda tutilmoqda. Ushbu tashabbus ekspertlar muloqotini rivojlantirish, bilim va ilg‘or tajriba almashinuvini kengaytirish, shuningdek, xalqaro munosabatlar va mintaqalararo hamkorlik sohasida yuqori malakali mutaxassislarni tayyorlashga qaratilgan. Mazkur tashabbusning muhokama qilinishi JIDU va yevropalik hamkorlar o‘rtasidagi akademik hamda ekspertlik aloqalarini kengaytirish, shuningdek, Markaziy Osiyo va Yevropa Ittifoqi o‘rtasidagi ta’lim sohasidagi hamkorlikni mustahkamlash uchun yangi istiqbollarni ochib beradi.
Joriy yilning 29-oktabr kuni Jahon iqtisodiyoti va diplomatiya universitetida Sankt-Peterburg davlat universiteti (SPbDU) professorlari Yuriy Akimov va Kristina Minkova JIDU hamda SPbDU o‘rtasidagi ikki tomonlama hamkorlik doirasida “Rossiya zamonaviy xalqaro munosabatlar tizimida” o‘quv kursi bo‘yicha mahorat darsi o‘tdilar. Rossiyalik olimlar “Xalqaro munosabatlar” fakultetining 4-bosqich talabalariga “Zamonaviy jahon siyosatida submilliy ishtirokchilar: tahdid va imkoniyatlar” mavzusida ma’ruza o‘qidilar. Professor Yuriy Akimov o‘z ma’ruzasida zamonaviy xalqaro munosabatlar hamda Rossiya tashqi siyosatida submilliy subyektlar va paradiplomatiyaning o‘rni haqidagi qarashlari bilan o‘rtoqlashdi. Munozaralar davomida talabalar paradiplomatiyani rivojlantirish, zamonaviy xavf-xatar va tahdidlarga qarshi turish hamda boshqa davlatlar bilan hamkorlikni kengaytirish masalalarini muhokama qilish imkoniga ega bo‘ldilar.
2026-yil 28-oktabr kuni Jahon iqtisodiyoti va diplomatiya universitetida Xalqaro munosabatlar fakultetining to‘rtinchi bosqich talabalari uchun «AQSH tashqi siyosati» fani doirasida «AQSHning zamonaviy siyosati: harakatlantiruvchi kuchlar, mexanizmlar va usullar» mavzusida mahorat darsi bo‘lib o‘tdi. Tadbirning asosiy ma’ruzachisi sifatida tarix fanlari doktori, Sankt-Peterburg davlat universiteti professori, «Sankt-Peterburg davlat universiteti axborotnomasi. Xalqaro munosabatlar» jurnalining bosh muharriri Yuriy Germanovich Akimov ishtirok etdi. Mahorat darsi davomida professor Y.G. Akimov mazmunli ma’ruza bilan chiqib, AQSH zamonaviy tashqi siyosatining harakatlantiruvchi kuchlari, mexanizmlari va usullarini batafsil yoritib berdi. Ma’ruzada AQSH tashqi siyosiy yo‘nalishining shakllanish xususiyatlari, xalqaro munosabatlar tizimi transformatsiyasi hamda xalqaro maydonda o‘zaro hamkorlikning yangi bosqichiga o‘tish sharoitida mamlakat strategiyasiga alohida e’tibor qaratildi. Ma’ruza talabalarda katta qiziqish uyg‘otdi. Ular muhokama davomida faol savollar berib, dolzarb muammolarni ko‘tardilar. Ayniqsa, AQSH tashqi siyosatining joriy dinamikasi yuzasidan bildirilgan baholar hamda dunyoning turli mintaqalaridagi inqirozli vaziyatlarning keyingi rivojlanishiga oid prognozlar alohida qiziqish uyg‘otdi.
