Joriy yilning 25-oktabr kuni “O‘zbekistonda xalqaro hamkorlik tashabbuslari haftaligi” doirasida “O‘zbekiston tashqi siyosati: tinchlik uchun ochiqlik va farovonlik” mavzusida davra suhbati bo‘lib o‘tdi.

Tadbirda Oliy Majlis Senati Raisining birinchi o‘rinbosari, JIDU rektori Sodiq Safoyev, Tashqi ishlar vazirining birinchi o‘rinbosari Baxromjon A’loyev, dunyoning yetakchi davlatlaridan kelgan siyosatchilar va ekspertlar, shuningdek, JIDU professor-o‘qituvchilari, magistrantlari va talabalari ishtirok etdi.

S.Safoyev o‘z nutqida so‘nggi yillarda mamlakatimiz ham mintaqada, ham jahon miqyosida tinchlik va barqarorlikni mustahkamlashga qaratilgan ochiqlik, hamkorlik va farovonlik strategik yo‘nalishini ishonch bilan bosib o‘tganini alohida ta’kidladi.

“O‘zbekiston asosiy davlatlar va xalqaro tashkilotlar bilan ikki tomonlama va ko‘p tomonlama aloqalarni kengaytirmoqda. Markaziy Osiyoning qo‘shni davlatlari bilan aloqalarni mustahkamlash eng muhim yo‘nalish bo‘lib qoladi, bu esa barqaror va o‘zaro bog‘langan mintaqani yaratishga xizmat qiladi”, - dedi S.Safoyev.

Davra suhbati ishtirokchilari xalqaro iqtisodiy munosabatlarga ochiqlik O‘zbekiston tashqi siyosatining markaziy yo‘nalishlaridan biriga aylanganiga e’tiborini qaratdi. Mamlakatimiz xorijiy investitsiyalarni faol jalb etib, yirik infratuzilma loyihalarini amalga oshirish uchun xalqaro moliya tashkilotlari bilan hamkorlik qilmoqda. Islohotlar va ishbilarmonlik muhitining yaxshilanishi tufayli O‘zbekiston xorijiy investorlar uchun jozibador bozorga aylanmoqda.

O‘zbekiston tashqi siyosiy faoliyatining asosiy shakllaridan biri parlament diplomatiyasini faollashtirish ekanligi alohida ta’kidlandi. Turli mamlakatlar bilan parlamentlardagi do‘stlik guruhlari qonunchilik darajasida tajriba almashish va o‘zaro anglashuvni mustahkamlashga ko‘maklashmoqda.

O‘zbekistonning tashqi siyosati ham gumanitar hamkorlikni rivojlantirishga qaratilgan. Talabalar almashinuvi dasturi kengaymoqda, mamlakatimiz oliy o‘quv yurtlarida xorijlik talabalarni qabul qilish kvotalari ko‘paymoqda, o‘zbek madaniyatini xorijda targ‘ib etish bo‘yicha ishlar olib borilayotgani madaniy-ma’rifiy sohalarda xalqaro hamkorlikni mustahkamlamoqda.

Davra suhbati ishtirokchilari o‘z xulosalarida O‘zbekiston mintaqada uzoq muddatli barqarorlik va farovonlikni ta’minlashga qaratilgan ochiq, pragmatik va tinchliksevar tashqi siyosatga sodiqligini tasdiqladilar.