Joriy yilning 11-yanvar kuni Jahon iqtisodiyoti va diplomatiya unversitetida 14-yanvar – Vatan himoyachilari kuni munosabati bilan OTMlar talabalari o‘rtasida “VATAN HIMOYASI MUQADDAS BURCH!” shiori ostida “Zakovat” intеllеktual o‘yini tashkil qilindi.

Unda poytaxtimizdagi oliy ta’lim muassasalari, xususan, Amir Temur nomidagi Davlat xavfsizlik xizmati akademiyasi, O‘zbekiston Respublikasi Ichki ishlar vazirligi akademiyasi, Favqulodda vaziyatlar vazirligi akademiyasi, Jamoat Xavfsizligi universiteti, Oʼzbekiston Respublikasi Davlat bojxona qoʼmitasining Bojxona instituti hamda Toshkent davlat yuridik universitetining talabalari ishtirok etdi.

Qizg‘in va muhokamalarga boy tarzda o‘tgan intellektual o‘yinda qatnashchilar faqatgina o‘zlarining bilim-tafakkurinigina emas, balki mantiqiy fikrlash va jamoaviy ishlash ko‘nikmalarini ham namoyish etishdi.

Tadbirda JIDU Yoshlar masalalari va ma’naviy-ma’rifiy ishlar bo‘yicha birinchi prorektori O.Yusufjonov so‘zga chiqib, yoshlarda Vatanga mehr-muhabbat tuyg‘usini shakllantirish, ularning intellektual va ma’naviy salohiyatini oshirish bugungi kunning muhim masalalaridan biri ekanligini ta’kidladi. Bunday tadbirlar ishtirokchilar uchun o‘zaro bilim almashish imkonini taqdim etish bilan birga ular o’rtasida do‘stlik va hamkorlikni mustahkamlashi, bir-birlarining fikrlarini hurmat qilish va jamoaviy ishlash ko‘nikmalarini rivojlantirishga yordam berishi aytib o’tdi.

“Zakovat” intеllеktual o‘yinining natijalarga ko‘ra, birinchi o‘rinni Bojxona institutining “Legion” jamoasi egalladi. Faxrli ikkinchi o‘rin Toshkent davlat yuridik universiteti talabalariga, uchinchi o‘rin esa Bojxona institutining yana bir jamoasiga nasib etdi. O‘yin yakunida barcha ishtirokchilar diplom va qimmatbaho sovg‘alar bilan taqdirlandi.