Joriy yilning 25-dekabr kuni Jahon iqtisodiyoti va diplomatiya universitetida Ozarbayjon Respublikasining Boku davlat universiteti delegatsiyasi bilan uchrashuv bo‘lib o‘tdi. 

Ozarbayjon delegatsiyasi tarkibiga Fan va innovatsiyalar bo‘yicha prorektor - X.Mammadov, Itimoiy masalalar, talaba ishlari jamoatchilik bilan aloqalar bo‘yicha prorektor - A.Agamirzayev, Moliya va ma’muriy masalalar bo‘yicha rektor maslahatchisi - M. Mirzayev, Ta'lim jarayonini tashkil etish va boshqarish markazi rahbari - E.Mammadov kirdi.

JIDU tomonidan Ilmiy ishlar va innovatsiyalar bo‘yicha prorektor - G.Ismailova, Yoshlar masalalari va maʼnaviy-maʼrifiy ishlar boʻyicha birinchi prorektor – O.Yusupdjanov, Xalqaro munosabatlar fakulteti dekani - Sh.Arapov, Хalqaro iqtisodiyot va menejment fakulteti dekani - M.Xamdamov, O‘zbek va rus tillari kafedrasi mudiri - M.Abdurahmonova, shuningdek, Xalqaro akademik hamkorlik ofisi rahbari - G.Mirxalilova ishtirok etdi.

Uchrashuv ikki tomonlama akademik hamkorlikni kengaytirish, qo‘shma diplom dasturlarini joriy etish imkoniyatlari, talabalar va professor-o‘qituvchilar almashinuvini tashkil etish, ma‘ruzalar va mahorat darslarini o‘tkazish, shuningdek O‘zbek va Ozarbayjon madaniyatlarini universitetlarda ommalashtirish va o‘zaro aloqalar uchun yangi yo‘nalishlarni aniqlash maqsadida tashkil etildi.

Uchrashuv davomida tomonlar barqaror rivojlanish, mintaqaviy jarayonlar sohasida qo‘shma tadqiqotlar o‘tkazish istiqbollari, ilmiy nashrlarni chop etish, shuningdek, grant loyihalarida ishtirok etish masalalarini muhokama qildilar.

O‘z navbatida, JIDU, hamkorlikni jadallashtirish, bilim va tajriba almashish, madaniy va ma’rifiy aloqalarni rivojlantirish maqsadida ikki tomonning talabalar uyushmalari o‘rtasida aloqalar o‘rnatishni taklif qildi.

Uchrashuv yakunida tomonlar muhokama qilingan hamkorlik yo‘nalishlarini amalga oshirishni batafsil ishlab chiqish bo‘yicha kelishib oldilar. O‘zbekiston-Ozarbayjon akademik aloqalarini rivojlantirishga qaratilgan aniq qadamlarni, jumladan, qo‘shma ta’lim dasturlarini tashkil etish, ilmiy konferensiyalar o‘tkazish, talabalar va o‘qituvchilar almashinuvini yo‘lga qo‘yishga o‘zaro qiziqish bildirildi. Ushbu chora-tadbirlar ta’lim va fan sohasidagi sherikchilikni mustahkamlashga, shuningdek, boshqa yo‘nalishlarda hamkorlik imkoniyatlarini kengaytirishga turtki bo‘lishi ta’kidlandi.

Ma'lumot uchun: Boku davlat universiteti (BDU) 1919 - yilda Ozarbayjonning Boku shahrida  tashkil etilgan. BDU mamlakatning yirik oliy o‘quv yurtlaridan biri hisoblanib, (talabalar soni 25 000 nafar) turli xil ilmiy yo‘nalishlar bo‘yicha bakalavriat, magistratura va doktorantura dasturlarini taklif etadi. BDUda 1,500 ta xalqaro talabalar tahsil oladi. QS Jahon universitetlari reytingida 951-1000 oralig‘idagi mavqega ega.