Joriy yilning 4-5 dekabr kunlari Tojikistonning Dushanbe shahrida «Korrupsiyaning oldini olish: inson huquqlarini himoya qilish va davlat boshqaruvining samaradorligini ta'minlash vositasi sifatida: holat va istiqbollar» mavzusida xalqaro ilmiy-amaliy konferensiya bo‘lib o‘tdi. Mazkur tadbir Inson huquqlari umumjahon deklaratsiyasi qabul qilingan sana va Xalqaro korrupsiyaga qarshi kurash kuniga bag‘ishlandi. 

Ushbu nufuzli tadbirda Jahon iqtisodiyoti va diplomatiya universitetidan Yoshlar bilan ishlash va ma'naviy-ma’rifiy ishlar bo‘yicha birinchi prorektor, yuridik fanlari nomzodi, dotsent O. Yusupjanov ishtirok etdi.

Konferensiya davomida korrupsiyaga qarshi kurash orqali inson huquqlarini himoya qilish, boshqaruvda oshkoralikni ta'minlash va samarali choralarni ishlab chiqish masalalari muhokama qilindi. Mintaqaviy muammolar va xalqaro hamkorlik istiqbollari ham alohida e’tibor markazida bo‘ldi. 

Anjumanda JIDU birinchi prorektori O. Yusupjanov nutq bilan ishtirok etib, ishtirokchilarning e’tiborini O‘zbekistonning korrupsiyaga qarshi kurashdagi tajribasiga qaratdi va mamlakatda amalga oshirilayotgan islohotlar yuzasidan ma’lumot berdi.

Tadbir davomida Tojikiston Respublikasi Prezidenti huzuridagi Davlat boshqaruvi akademiyasi va JIDU o‘zaro hamkorlikni yanada rivojlantirishga kelishib oldi.