Joriy yilning 18-dekabr kuni Jahon iqtisodiyoti va diplomatiya universitetida “O‘zbekistonda ekspert diplomatiyasi: mamlakatni rivojlanish yo‘nalishlarini shakllantirishda tahlil markazlar va tahliliy nashrlarning o‘rni” mavzusida xalqaro davra suhbati bo‘lib o‘tdi.

“Xalqaro munosabatlar: siyosat, iqtisod, huquq” jurnali va JIDU qoshidagi Istiqbolli xalqaro tadqiqotlar instituti (IXTI) hamkorligida tashkil etilgan tadbirda O‘zbekistonning yetakchi ekspertlari va olimlariga tahliliy markazlar va tahliliy nashrlar milliy va xalqaro siyosatni qanday shakllantirayotganini o‘rganish imkoniyatini berdi.

Davra suhbatida Yevropa Ittifoqining O‘zbekistondagi elchisi Toivo Klaar, Xitoy, Fransiya, Italiya, Rossiya va Qozog‘iston elchixonalari, EXHT vakillari, shuningdek, olimlar, ekspertlar, JIDU doktorantlari, magistrantlari va talabalari ishtirok etdi.

Seminarni JIDU o‘quv ishlari bo‘yicha birinchi prorektori Akram Umarov tabrik so‘zi bilan ochdi. U O‘zbekistonning strategik rivojlanishida ekspert diplomatiyasining ahamiyati tobora ortib borayotganini ta’kidlab, tahlil markazlari va tadqiqot nashrlari asosli siyosatni ishlab chiqishga qanday hissa qo‘shayotgani va mamlakatning jahon miqyosidagi diplomatik sa’y-harakatlarini qo‘llab-quvvatlayotgani haqida so‘zladi.

“Tahliliy markazlar – O‘zbekiston taraqqiyoti yo‘nalishlarini shakllantirish vositasi”mavzusidagi birinchi panel moderatori, IXTI direktorining o‘rinbosari Shaxboz Axmedov tahlil markazlari siyosatni ishlab chiqish va amalga oshirishda, ayniqsa, dolzarb milliy va mintaqaviy vazifalarni hal etishda muhim vosita sifatida xizmat qilishi haqida ma’lumot berdi.

Strategik va mintaqalararo tadqiqotlar instituti (SMTI) katta ilmiy xodimi Sharif Axmedov panelni ochib, O‘zbekiston siyosatini shakllantirishda SMTIning strategik o‘rni haqida gapirdi. U tahdidlarni har tomonlama baholash zarurligini ta’kidlab, milliy va mintaqaviy barqarorlikni ta’minlash uchun amaliy tavsiyalar berdi. Shundan so‘ng, Tashqi siyosiy tadqiqotlar va xalqaro tashabbuslar markazi katta ilmiy xodimi Shahodat Xoshimova tahliliy markazlar ko‘magida diplomatiyadagi innovatsion yondashuvlar haqida so‘zladi. U O‘zbekistonning mintaqaviy hamkorlik va ko‘p tomonlama platformalarga jalb etilishini oshirishda ma’lumotlarga asoslangan modellardan foydalanish muhimligini ta’kidladi.

Muhokamani davom ettirib, Markaziy Osiyo xalqaro institutiyetakchi ilmiy xodimi Ozod Tanbayev O‘zbekistondagi tahlil markazlari duch kelayotgan muammolarni ko‘rib chiqdi. Bundan tashqari, Taraqqiyot strategiyasi markazi bo‘lim boshlig‘I Farrux Xakimov tahlil markazlari hukumatning rivojlanish maqsadlariga erishishini qo‘llab-quvvatlashda qo‘llaydigan amaliy mexanizmlar haqida so‘zlab berdi.

Muhokama so‘ngida IXTIning Amerika tadqiqotlari markazi rahbari Ulug‘bek Ishanxo‘jayev O‘zbekistondagi tahliliy an’analarning o‘ziga xos jihatlarini taqdim etdi. U tadqiqot yo‘nalishlarini kengaytirish muhimligini ta’kidladi, shuningdek, milliy manfaatlarni global tendensiyalar bilan muvofiqlashtirishga qaratilgan siyosatni shakllantirishda tahliliy markazlarning muhim rolini alohida qayd etdi.

“Xalqaro munosabatlar: siyosat, iqtisod, huquq” jurnali bosh muharriri Ulug‘bek Xasanov “Jamoatchilik fikri va tashqi siyosatni shakllantirishda tahliliy nashrlarning roli” mavzusidagi ikkinchi panel moderatori bo‘ldi.

 U o‘zining kirish so‘zida tahliliy nashrlarning ijtimoiy muhokamani shakllantirish va qaror qabul qiluvchi shaxslarga ta’sir ko‘rsatishdagi o‘zgaruvchan kuchini ta’kidladi.

Sessiya doirasida Xalqaro Vestminster universiteti Siyosiy tadqiqotlar va targ‘ibot markazi direktori Bekzod Zokirov, JIDU dotsentlari Gavhar Sultonova va Muzaffar Munavvarovlar so‘zga chiqdilar. Spikerlar strategik nashrlar jamoatchilikning tashqi siyosiy tashabbuslarini tushunish va qo‘llab-quvvatlashni shakllantirishini ta’kidladilar. Muhokama yakunlari bo‘yicha JIDU kafedra mudiri Gulnora Raimova barqaror rivojlanishni ta’minlashda ilmiy izlanishlarga asoslangan nashrlar muhimligiga e’tibor qaratdi. U tadqiqotning dolzarbligi va ta'sirini ta'minlash uchun milliy rivojlanish strategiyalari bilan uyg'unlashtirish muhimligini ta'kidladi.

JIDUda bo‘lib o‘tgan xalqaro davra suhbati nafaqat faol intellektual almashuv uchun imkoniyat yaratdi, balki O‘zbekistonning jahon va ichki siyosatining ustuvor yo‘nalishlarini ilgari surishda tahlil markazlari va tahliliy nashrlarning muhim rolini kuchaytirdi.