Joriy yilning 17-noyabr kuni Muhammad al-Xorazmiy nomidagi Toshkent axborot texnologiyalari universiteti tomonidan o‘tkazilgan Respublika miqyosidagi nufuzli “Kriptologiya” fan olimpiadasida JIDU talabalari faol ishtirok etib, yuqori tayyorgarlik va raqobatbardoshlikni namoyish etdilar.

Mazkur olimpiadalarda JIDU talabalari kriptografiya va kiberxavfsizlik sohasi bo‘yicha mutaxassis bo‘lgan, Tizimli tahlil va matematik modellashtirish kafedrasi katta o‘qituvchisi I.Yarashov rahbarligida qatnashdilar. U talabalarni puxta tayyorlash uchun alohida mashg‘ulotlar o‘tkazib, ularga murakkab kriptotahlil masalalarini hal qilishda qanday strategiyalarni qo‘llash kerakligini amaliy jihatdan tushuntirdi. Bundan tashqari, olimpiada oldidan talabalariga masalalarga yondashuvning samarali usullari, diqqatni qaratish lozim bo‘lgan muhim elementlar va ma’lumotlarni to‘g‘ri tahlil qilish bo‘yicha ko‘nikmalarni yetkazdi. Bu esa talabalar muvaffaqiyatida hal qiluvchi ahamiyat kasb etdi.

Olimpiada jarayonida JIDU talabalari o‘zlarining nazariy bilimlari va amaliy ko‘nikmalarini namoyish etib, zamonaviy kriptografik usullar va axborot xavfsizligi masalalarini hal qilish bo‘yicha yuqori natijalarga erishdilar. Musobaqa nafaqat talabalar o‘rtasida innovatsion fikrlashni rivojlantirishga, balki ularni mantiqiy tahlil va amaliy muammolarni hal etish borasida yangi bosqichga olib chiqishga xizmat qildi.

Ta’kidlash joizki, respublika bo‘ylab 27 ta oliy ta’lim muassasasidan 73 nafar talaba ishtirok etgan ushbu nufuzli ilmiy musobaqa, talabalarning ilmiy va amaliy bilimlarini sinovdan o‘tkazish imkoniyatini yaratdi.