Joriy yilning 15-mart kuni  Oliy Majlis Senati Raisining birinchi o‘rinbosari, Jahon iqtisodiyoti va diplomatiya universiteti rektori Sodiq Safoyev Moskva davlat xalqaro munosabatlar instituti Toshkent filialida 2024-yilda barqaror rivojlanish bo‘yicha xalqaro yoshlar forumi ishtirokchilari bilan uchrashuv o'tkazdi.

S. Safoyev o‘z nutqida yoshlarning barqaror rivojlanishdagi ishtiroki va bu jarayonda davlat institutlarining o‘rni muhimligini ta’kidladi.

U barqaror rivojlanishning global maqsadlariga to‘liq mos keladigan “Yangi O‘zbekistonning 2022-2026-yillarga mo‘ljallangan taraqqiyot strategiyasi” doirasida mamlakatda amalga oshirilayotgan keng ko‘lamli islohotlarga alohida e’tibor qaratdi. Mamlakatning asosiy yutuqlari orasida qashshoqlik darajasini pasaytirish, ijtimoiy himoya tizimini yaxshilash va oziq-ovqat xavfsizligini ta’minlash bo‘yicha sa’y-harakatlar ta’kidlandi.

Tadbir yakunida ishtirokchilar ushbu mavzu bo‘yicha o‘zlarini qiziqtirgan savollarni berish imkoniyatiga ega bo‘ldilar va ularga batafsil javoblar oldilar.