Joriy yilning 28-avgust kuni Jahon iqtisodiyoti va diplomatiya universitetida (JIDU) Ilmiy Kengashning kengaytirilgan yig‘ilishi, shuningdek, O‘zbekiston Respublikasi Davlat Mustaqilligining 32 yilligiga bag‘ishlangan tantanali tadbir bo‘lib o‘tdi.

Oliy Majlis Senati Raisining birinchi o‘rinbosari, JIDU rektori Sodiq Safoyev yig‘ilishning barcha ishtirokchilari, shuningdek, universitet jamoasi va talabalarini Mustaqillik bayrami va kirib kelayotgan yangi o‘quv yili bilan tabrikladi.

Ilmiy Kengash yig‘ilishida O‘zbekiston Respublikasi Prezidentining 2022-yil 23-iyuldagi “Jahon iqtisodiyoti va diplomatiya universitetini tizimli isloh qilish chora-tadbirlari to‘g‘risida”gi 330-son qarori ijrosi ko‘rib chiqildi.

Qayd etilishicha, mazkur hujjatda nazarda tutilgan vazifalarni bajarish doirasida JIDUning transformatsiyalar idorasi tashkil etilib, universitetni o‘rta va uzoq muddatli rivojlantirish dasturi qabul qilingan. Bakalavriat va magistratura yo‘nalishlarining barcha yo‘nalishlari bo‘yicha yangi o‘quv dasturlari ishlab chiqildi. O‘quv dasturlariga konseptual o‘zgartirishlar kiritildi, o‘quv jarayonining o‘zi to‘liq yangilangan Ta’limni boshqarish tizimiga (LMS) o‘tkazildi.

JIDUning o‘quv va ilmiy faoliyatida dunyoning 10 dan ortiq davlatidan 50 ga yaqin mutaxassislar faol ishtirok etmoqda. O‘tgan o‘quv yilida universitetda 150 dan ortiq xalqaro tadbirlar o‘tkazildi, xorijiy ta’lim muassasalari va nufuzli xalqaro tashkilotlar bilan 24 hamkorlik shartnomasi imzolandi. Xitoyning Huawei kompaniyasi ko‘magida Smart University konsepsiyasini amalga oshirish boshlandi.

Davlatimiz rahbarining qaroriga muvofiq, JIDU qoshida Diplomatik akademiya va Xalqaro istiqbolli tadqiqotlar instituti tashkil etilib, o‘z faoliyatini muvaffaqiyatli boshladi.

Ilg‘or xorijiy tajriba asosida Jahon iqtisodiyoti va diplomatiya universiteti qoshidagi akademik litsey faoliyati isloh qilinmoqda. Hozirda litsey Germaniyaning VIADRINA universiteti va Finlyandiyaning Kareliya amaliy fanlar universiteti bilan hamkorlikda qo‘shma ta’lim dasturlarini amalga oshirish bo‘yicha shartnomalar imzolagan.

Yig‘ilishda so‘zga chiqqan Ilmiy Kengash a’zolari erishilgan yutuqlarga e’tibor qaratib, o‘quv va ilmiy-tadqiqot faoliyatini yanada takomillashtirish bo‘yicha takliflar bildirdilar.

Ilmiy Kengashning kengaytirilgan yig‘ilishi yakunlarini sarhisob qilar ekan, universitet rektori S.Safoyev oliy o‘quv yurtini modernizatsiya qilishga qaratilgan Prezident qarorini to‘liq hayotga tatbiq etish borasida hali ko‘p ishlar qilinishi kerakligini va bu boradagi ishlar izchil davom ettirilishini alohida ta’kidladi. Uning asosiy maqsadi zamonaviy bilimga ega, yuksak ma’naviy-axloqiy fazilatlarga ega, mustaqil, tanqidiy va ijodiy fikrlaydigan yuqori malakali kadrlar tayyorlashdan iborat.

“Davlatimiz rahbari tomonidan Jahon iqtisodiyoti va diplomatiya universiteti zimmasiga yuklangan ushbu muhim vazifaga professor-o‘qituvchilar, butun jamoa yuksak mas’uliyat va yakdillik bilan yondashishiga ishonaman”, – dedi rektor.