2024-yilning 22-23-yanvar kunlari Jahon iqtisodiyoti va diplomatiya universiteti (JIDU) o‘quv ishlari bo‘yicha birinchi prorektori Durbek Amanov boshchiligidagi delegatsiya O‘zbekiston-Xitoy qo‘shma ta’lim forumida ishtirok etdi.

Ushbu tadbir doirasida mamlakatimiz Oliy ta’lim, fan va innovatsiyalar vazirligi hamda Xitoy Xalq Respublikasi Ta’lim vazirligi vakillari o‘rtasida ham uchrashuvlar bo‘lib o‘tdi.

Forumda jami 250 ga yaqin kishi ishtirok etdi (jumladan, O‘zbekiston va Xitoyning yirik universitetlari rektorlari).

Tadbir avvalida O‘zbekiston Respublikasi Oliy ta’lim, fan va innovatsiyalar vazirining birinchi o‘rinbosari Komiljon Karimov va Xitoy Xalq Respublikasi ta’lim vaziri o‘rinbosari Cheng Jie o‘rtasida uchrashuv tashkil etildi.

Tomonlar davlatimiz rahbarining Xitoy Xalq Respublikasiga davlat tashrifi nuqtai nazaridan ikki mamlakat o‘rtasida fan, texnika va ta’lim sohalaridagi ikki tomonlama hamkorlikning istiqbolli masalalarini muhokama qildi.

Forum quyidagi yo‘nalishlar bo‘yicha panel sessiyalardan iborat bo‘ldi:

- aniq fanlar;

- muhandislik;

- Qishloq xo‘jaligi;

- AKT;

- gumanitar fanlar;

- tibbiyot va farmatsevtika.

Tadbir doirasida JIDU delegatsiyasi va «University of International Business and Economics», «Beijing Foreign Studies University» kabi oliy ta’lim muassasalari, shuningdek, «China Ouyu Huatong company» и «Huawei Technologies Co.» kabi kompaniyalar vakillari bilan alohida uchrashuvlar o‘tkazildi va ko‘rgazma zalini ochish to‘g‘risida shartnoma imzolandi.

Umuman olganda, O‘zbekiston-Xitoy ta’lim forumi yakunlari bo‘yicha ikki davlat oliy ta’lim muassasalari o‘rtasida 70 ta ikki tomonlama hujjat imzolandi, 5 ta universitet o‘rtasida qo‘shma ta’lim dasturlarini tashkil etish bo‘yicha kelishuvlarga erishildi.

Erishilgan kelishuvlar 300 dan ortiq talabalarimizga Xitoyning yetakchi universitetlarida sifatli ta’lim olish imkonini bermoqda. Shuningdek, 100 dan ortiq o‘zbekistonlik talabalar uchun grant dasturlarini tashkil etish bo‘yicha kelishuvlarga erishildi.

Tadbir yakunida O‘zbekiston va Xitoy Oliy o‘quv yurtlari o‘rtasidagi hamkorlik to‘g‘risidagi Pekin deklaratsiyasi qabul qilindi. Hujjat doirasida ikki mamlakatning oliy ta'lim muassasalari o‘rtasida institutsional platforma yaratish, Xitoy-Markaziy Osiyo ta’lim hamkorligi modelini shakllantirish, shuningdek, akademik almashinuv dasturlarini yanada rivojlantirish, qo‘shma ilmiy va innovatsion loyihalarni amalga oshirish ko‘zda tutilgan.