Joriy yilning 21-sentabr kuni Jahon iqtisodiyoti va diplomatiya universitetida “Raqamli boshqaruv va  SMART universitetni tashkil  etishda  Yaponiya  tajribasi” mavzusida ilmiy seminar bo‘lib o‘tdi.

Tadbir JIDU huzuridagi Istiqbolli xalqaro tadqiqotlar institutining Osiyo va Tinch okeani mintaqasi tadqiqot markazi hamda Yaponiyaning O‘zbekistondagi elchixonasi hamkorligida tashkil etildi.

Seminarda Yaponiya Tashqi ishlar vazirligi loyihasi doirasida O‘zbekistonga tashrif buyurgan Yaponiya axborot texnologiyalari federatsiyasi direktori, professor Toshiaki Tateishi ma’ruza qildi.

U o‘z nutqida bugungi kunda raqamli texnologiyalar sohasida mutaxassislarga bo‘lgan talab naqadar yuqori ekanligini ta’kidlab o‘tdi. Shuningdek, u ta’lim sohasida shaffoflikni ta’minlash uchun yaxlit elektron  tizim  shakllantirilishi  lozimligiga  alohida  e’tibor  qaratdi.

Professor Tateishi ayni damda  dolzarb mavzuga  aylangan sun’iy intellekt borasidagi  o‘z qarashlarini ham bayon  etdi. Uning fikricha, talabalar uchun axborot bazasini yaratish, ularning bilimini baholash kabi vazifalarni sun’iy intellektga ishonib topshirish mumkin.

Seminarda JIDUni “SMART universitet” konsepsiyasi asosida isloh qilish  jarayonida Yaponiya tajribasidan faol foydalanish masalasi  ko’rib  chiqildi.

   “Biz O‘zbekiston bilan raqamli texnologiyalar, ayniqsa, ulardan ta’lim sohasida foydalanish borasida tajriba almashish va yaqin hamkorlik qilishga tayyormiz”, – dedi Yaponiya axborot texnologiyalari federatsiyasi direktori.

Ma’ruzasi yakunida professor Tateishi talabalarning ko‘plab savollariga  atroflicha javob berdi.