2025 yil 15-yanvar kuni Jahon iqtisodiyoti va diplomatiya universitetida (JIDU) AQSh elchisining jamoatchilik bilan aloqalar bo‘yicha maslahatchisi Lora Braun, shuningdek, Jamoatchilik bilan aloqalar bo‘limi xodimlari Harris Lipskomb va Saida Musaxonova bilan uchrashuv o‘tkazildi. 

Uchrashuvda Lora Braunga JIDU faoliyati, Ilg‘or xalqaro tadqiqotlar institutida amalga oshirilayotgan Amerika tadqiqotlari sohasidagi ilmiy loyihalar hamda xorijiy hamkorlar bilan qo‘shma dasturlar haqida ma’lumot berildi. 

AQSh Elchisining maslahatchisi O‘zbekiston va AQSh ikki tomonlama munosabatlarining ijobiy rivojlanish dinamikasini ta’kidlab, mintaqada ko‘p tomonlama hamkorlikni kengaytirishda O‘zbekistonning o‘rni va AQSh olimlarining Markaziy Osiyo tadqiqotlariga bo‘lgan qiziqishini qayd etdi. 

Uchrashuv doirasida ilmiy va akademik hamkorlikni rivojlantirish masalalari muhokama qilindi. JIDU Amerika oliy o‘quv yurtlari va tadqiqot institutlari bilan talabalar va professor-o‘qituvchilarning akademik almashuv dasturlari, qo‘shma ta’lim loyihalari, treninglar hamda malaka oshirish kurslarini amalga oshirishda hamkorlikni kuchaytirishga tayyor ekanligini bildirdi. 

Uchrashuv yakunida Lora Braun JIDU tashabbuslarini qo‘llab-quvvatlashga tayyor ekanligini bildirar ekan, ta’lim va ilm-fan sohalarida O‘zbekiston va AQSh munosabatlarini rivojlantirishga hissa qo‘shish istagini ifoda etdi.