Joriy yilning 26-dekabr kuni Jahon iqtisodiyoti va diplomatiya universitetida o‘qishda va jamoat ishlarida o‘z o‘rniga ega bo‘lgan professor-o‘qituvchilar, xodimlar va talabalarni iliq va do‘stona ruhda birlashtirgan Yangi yil bayramiga bag‘ishlangan “Yangi yil oqshomi” nomli badiiy tadbir bo‘lib o‘tdi.

O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev bayramni ochib berar ekan, universitet jamoasining shu yili erishgan yutuqlarini alohida ta’kidlab, kelgusida yangi yutuqlarga erishishga umid bildirdi.

Bayram tadbiri doirasida o‘quv jarayoni va ilmiy faoliyatni rivojlantirishga katta hissa qo‘shgan JIDU xodimlarini taqdirlash marosimi bo‘lib o‘tdi. Shuningdek, davlat stipendiyalarni qo‘lga kiritgan iqtidorli talabalar hamda “Zakovat” intellektual o‘yini g‘oliblari taqdirlandi.

So‘ngra otashin xalq o‘yinlari va mashhur qo‘shiqlardan iborat katta konsert dasturi bo‘lib o‘tdi.

Tadbir so‘ngida bufet tashkil etildi, unda ishtirokchilar bir-birlari bilan muloqot qilishlari, taassurotlari bilan o‘rtoqlashishlari va yangi yil rejalarini muhokama qilishlari mumkin edi.

Bayram tadbiri universitet xodimlari o‘rtasida o‘zaro hamjihatlik va do‘stona rishtalarni mustahkamlashga ajoyib imkoniyat yaratib, yangi yil bayrami arafasida ko‘tarinki kayfiyat uyg‘otishga xizmat qildi.