Yangi yil arafasida Jahon iqtisodiyoti va diplomatiya universiteti talabalari kam ta’minlangan oilalarga yangi yil sovg‘alarini tarqatish bo‘yicha aksiya tashkil etishdi. Ushbu tashabbus BMTning Barqaror rivojlanish maqsadlariga (BRM) erishishga qaratilgan JIDU dasturi doirasida amalga oshirildi.

Nemis tili bo‘yicha ikkinchi va uchinchi kurs talabalari “Qutidagi quvonch” deb nomlangan loyihani amalga oshirdilar, unda shirinliklar, mevalar, oziq-ovqat, kiyim-kechak va o‘yinchoqlar yig‘ildi. Sovg‘alar Toshkent shahrining Mirzo Ulug‘bek tumanidagi “Katta Oltintepa” mahallasida yashovchi 15 nafar kam ta‘minlangan oilaning yosh bolalariga topshirildi.

Mahalla qo‘mitasida tashkil etilgan bayram tadbirida sovg‘alar topshirildi. Qo‘mita raisi talabalarga o‘z minnatdorchiligini bildirdi va “Bunday saxovatli yoshlar, ayniqsa talabalarning borligi Vatanimiz kelajagi ishonchli qo‘llarda bo‘lishidan dalolat beradi” deb g‘urur bilan ta’kidladi.

Talabalar nafaqat bolalarga sovg‘alar berishdi, balki ular bilan suhbatlashishdi, kichkintoylar bilan o‘ynashdi. Ushbu tadbir barcha ishtirokchilarga insoniy mehr va saxovat tuyg‘ularining kuchini his qilish imkonini berdi.