Joriy yilning 29-noyabr kuni Jahon iqtisodiyoti va diplomatiya universitetida “Sotsiologik tadqiqotlarda omilli tahlilning ahamiyati. Germaniyada tashqi migratsiya masalalariga qo`llash” mavzusida o'quv-uslubiy seminar bo‘lib o‘tdi.

Tizimli tahlil va matematik modellashtirish kafedrasi tomonidan tashkil etilgan seminarda fizika-matematika fanlari doktori, professor G.Raimova so‘zga chiqdi. Ma’ruzachi omilli tahlil va uning sotsiologik tadqiqotlarda qo‘llanilishi haqida ma’lumot berdi.

Ta'kidlanganidek, to'g'ri so'rov usulini tanlash ishonchli va tegishli ma'lumotlarni olish uchun juda muhimdir. Zamonaviy usullardan biri - omilli tahlil tadqiqotchi uchun ikkita muhim muammoni hal qilish imkonini beradi: o'lchov ob'yektini har tomonlama va ayni paytda ixcham tasvirlash. Omilli tahlildan foydalanib, yashirin o'zgaruvchi omillarni aniqlash mumkin.

Yevropa Ittifoqi davlatlarining ijtimoiy-iqtisodiy landshaftiga turli ta’sir ko‘rsatadigan muhojirlar, qochqinlar yoki boshpana izlovchilar uchun jozibador joy ekanligini hisobga olib, omilli tahlil Marburg universiteti Sotsiologiya institutida tuzilgan so‘rovnoma yordamida tasvirlangan. Omilli tahlil usulini qo`llash asosida ikkita metallurgiya korxonasida migrantlarga munosabat o'rganildi. Tahlil natijasida quyidagi tarzda tavsiflanishi mumkin bo'lgan 3 omil aniqlandi: dushmanlik pozitsiyasi, xayrixoh pozitsiya va ijtimoiy qo'rquv. Bundan tashqari, ushbu omillarning turli yosh toifalari va ijtimoiy qatlamlarga ta'siri o'rganildi.

Ko‘rib chiqilayotgan mavzu Germaniya bilan mehnat migratsiyasi sohasida hamkorlikni yo‘lga qo‘yishni hisobga olgan holda O‘zbekiston uchun ham qiziqish uyg‘otmoqda.

Seminar davomida talabalar ko'p o'lchovli statistik tahlilning mashhur usullaridan biri bilan tanishish imkoniga ega bo'ldilar. Sotsiologik tadqiqot natijalaridan olingan muhim xulosalar talabalar auditoriyasida omilli tahlilga qiziqish uyg'otdi.