Joriy yilning 16 aprel kuni Jahon iqtisodiyoti va diplomatiya universitetida “O‘zbekiston Respublikasi fuqarolik huquqi tizimida zarar yetkazishdan kelib chiqadigan majburiyatlar” mavzusida mahorat darsi bo‘lib o‘tdi.

Mahorat darsida Toshkent davlat yuridik universiteti “Fuqarolik huquqi” kafedrasi o‘qituvchisi Sarvar Zafarovich Tojiboyev, “Fuqarolik huquqi va xalqaro xususiy huquq fanlari” kafedrasi professor-o‘qituvchilari hamda “Xalqaro huquq” fakulteti 2-kurs talabalari ishtirok etishdi.

Mahorat darsida Toshkent davlat yuridik universiteti o‘qituvchisi tomonidan fuqarolik huquqidagi bir tomonlama majburiyatlarning tushunchasi va mohiyati, huquqbuzarlik bilan bog‘liq majburiyatlarning tushunchasi va unsurlari, fuqaroning hayoti yoki sog‘lig‘iga yetkazilgan zararni qoplash tartibi, shuningdek, tovarlar, ishlar va xizmatlardagi nuqsonlar natijasida yetkazilgan moddiy va ma’naviy zararni qoplashning o‘ziga xos xususiyatlari atroflicha ko‘rib chiqildi.

Ushbu mahorat darsi Barqaror rivojlanishning 16-maqsadi – “Barqaror rivojlanish maqsadlari yo‘lida tinchliksevar va ochiq jamiyatlar barpo etilishiga ko‘maklashish, barcha uchun odil sudlov imkoniyatidan foydalanishni ta’minlash va barcha darajalarda samarali, hisobdor va keng ishtirokka asoslangan muassasalarni tashkil etish”, xususan, 16.3 band – “Qonun ustuvorligiga ko‘maklashish hamda barcha uchun odil sudlovdan foydalanish bo‘yicha teng imkoniyatlarni ta’minlash” tamoyillariga mos keladi.

Mahorat darsi yakunida O‘zbekiston Respublikasida fuqarolik huquqining asosiy institutlarini takomillashtirishning dolzarb masalalari muhokama qilindi.