Ta'limning yuqori sifati

Jahon iqtisodiyoti va diplomatiya universitetining bakalavriat dasturlari talabalarda global jarayonlarni chuqur anglash, murakkab masalalarni tahlil qilish hamda xalqaro darajada samarali faoliyat yuritish uchun zarur bo‘lgan fundamental bilim, amaliy ko‘nikma va zamonaviy dunyoqarashni shakllantiradi. Ta’lim jarayoni nazariy bilimlar, amaliy tayyorgarlik va fanlararo yondashuv uyg‘unligida tashkil etilgan. Bakalavriat bosqichida universitet quyidagi asosiy ta’lim yo‘nalishlarini taklif etadi: Xalqaro munosabatlar; Siyosatshunoslik; Jahon iqtisodiyoti va xalqaro iqtisodiy munosabatlar; Xalqaro-huquqiy faoliyat yo‘nalishidagi yurisprudensiya. Har bir dastur davlat boshqaruvi, diplomatiya, xalqaro hamkorlik, tahliliy faoliyat va zamonaviy mehnat bozori ehtiyojlarini hisobga olgan holda ishlab chiqilgan. Asosiy kompetensiyalar JIDU bakalavriat dasturlari bitiruvchilarda quyidagi kompetensiyalarni shakllantiradi: analitik va tanqidiy fikrlash; xalqaro siyosiy, iqtisodiy va huquqiy jarayonlarni tushunish; dalillarga asoslangan qaror qabul qilish; tadqiqot olib borish va ma’lumotlar bilan ishlash; professional yozma va og‘zaki muloqot; madaniyatlararo hamkorlik; hamda davlat, xususiy va xalqaro sektorlar uchun zarur bo‘lgan amaliy kasbiy tayyorgarlik. Ta’lim jarayonida talabalar akademik mobillik dasturlari, amaliyot, yetakchi mutaxassislar va ekspertlar bilan uchrashuvlar, ilmiy izlanishlar hamda loyiha faoliyati orqali o‘z bilim va ko‘nikmalarini amaliy muhitda rivojlantiradilar. Bu esa ularda mustaqil fikrlash, moslashuvchanlik, strategik yondashuv va professional mas’uliyatni yanada kuchaytiradi. Natijada bitiruvchilar milliy va xalqaro darajada raqobatbardosh, tashabbuskor, zamonaviy va yuqori malakali mutaxassislar sifatida shakllanadilar. Universitetda talabalarga ikkinchi xorijiy til sifatida 12 ta til ichidan tanlov qilish imkoniyati ham yaratilgan. Quyida bakalavriat dasturlari bilan tanishishingiz mumkin. Til yo‘nalishidagi fanlar Sillabus: Rus tili I,II (2025) Sillabus: O‘zbek tili I , II (2025) SHARQ TILLARI SILLABUSLARI (Barcha ta’lim yo‘nalishlari uchun) 2025 Ikkinchi chet tili sillabuslari, 2025/26 (Romano-german tillari) 2025/26 Ta’lim dasturlari bo‘yicha o‘quv jadvallari 2025/2026 o‘quv yili uchun akademik kalendar va amaliyot jadvali

Batafsil

JIDU'da o'qing

Jahon iqtisodiyoti va diplomatiya universiteti 1992-yil 23-sentabrda tashkil etilgan boʻlib, Oʻzbekiston Respublikasi Tashqi ishlar vazirligi qoshida faoliyat yuritadi.

Bu oliy taʼlim muassasasi boʻlib, mutaxassislar va ilmiy kengashni tayyorlash, qayta tayyorlash va ularning malakasini oshirish hamda quyidagi yoʻnalishlarda yuqori darajadagi fundamental va amaliy tadqiqotlar olib boradi:

Xalqaro iqtisodiyot va menejment;
Xalqaro munosabatlar va siyosatshunoslik;
Xalqaro ommaviy va xususiy huquq;
Yurisprudensiya.

Batafsil

Yangiliklar

Barcha yangiliklar

24.09.2026

JIDUda “Markaziy Osiyo – Yaponiya” tahliliy markazlari forumi bo‘lib o‘tdi

2026-yil 24-sentabr kuni Jahon iqtisodiyoti va diplomatiya universitetida “Markaziy Osiyo va Yaponiya: taraqqiyot va hamkorlikning umumiy qarashlarini ilgari surish” mavzusidagi tahliliy markazlar xalqaro forumining ikkinchi kuni bo‘lib o‘tdi. Forum tahliliy markazlar, ilmiy-tadqiqot institutlari, davlat organlari, ishbilarmon doiralar vakillarini, shuningdek, Yaponiya, Markaziy Osiyo mamlakatlari va Ozarbayjondan tashrif buyurgan yetakchi olimlar va ekspertlarni birlashtirdi. Tadbir 2025-yil 20-dekabr kuni Tokioda bo‘lib o‘tgan “Markaziy Osiyo plyus Yaponiya” muloqotining birinchi sammiti doirasida erishilgan kelishuvlarni amalga oshirishning amaliy mexanizmlarini rivojlantirishga qaratilgan ekspertlar hamkorligining davomi bo‘ldi. “Markaziy Osiyo plyus Yaponiya” muloqoti 2004-yilda Yaponiya tashabbusi bilan boshlangan va keyingi yigirma yil ichida Yaponiya va Qozog‘iston, Qirg‘iziston, Tojikiston, Turkmaniston hamda O‘zbekiston o‘rtasidagi ko‘p tomonlama hamkorlikning barqaror mexanizmiga aylandi. Davlat rahbarlarining birinchi sammiti ushbu formatga yangi turtki bag‘ishladi va kelgusidagi sheriklikning istiqbolli yo‘nalishlarini belgilab berdi. Sammit doirasida Tokio deklaratsiyasi qabul qilindi va hamkorlikning uchta asosiy yo‘nalishini nazarda tutuvchi CA+JAD Tokio tashabbusi ishga tushirildi: “Yashil rivojlanish va barqarorlik”, “O‘zaro bog‘liqlik” va “Inson kapitalini rivojlantirish”. Aynan shu ustuvor yo‘nalishlar forum doirasidagi ekspertlar muhokamalarining asosi bo‘ldi. Tadbir davomida ishtirokchilar “Markaziy Osiyo plyus Yaponiya” muloqotini yanada rivojlantirish istiqbollari, barqaror iqtisodiy rivojlanish, energetika xavfsizligi, yashil o‘tish va dekarbonizatsiya, shuningdek, muhim minerallar sohasidagi hamkorlik masalalarini muhokama qildilar. Transport va raqamli o‘zaro bog‘liqlikni, xalqaro transport yo‘laklarini rivojlantirish, sun’iy intellekt va ilg‘or texnologiyalarni joriy etish, shuningdek, raqamli transformatsiya sohasidagi hamkorlikni kengaytirishga alohida e’tibor qaratildi. Muhokamalarning muhim qismi inson kapitalini rivojlantirish, ta’lim va ilmiy hamkorlik masalalariga bag‘ishlandi. Mutaxassislar akademik va ilmiy almashinuvlarni kengaytirish, kadrlar tayyorlash, qo‘shma tadqiqot loyihalarini amalga oshirish, Yaponiya va Markaziy Osiyo davlatlarining universitetlari hamda tahliliy markazlari o‘rtasidagi hamkorlikni mustahkamlash imkoniyatlarini ko‘rib chiqdilar. Ekspertlar forumining o‘tkazilishi O‘zbekiston Respublikasi Prezidenti Shavkat Mirziyoyevning Toshkent shahrida Markaziy Osiyo va Yaponiyaning yetakchi tahliliy markazlari uchrashuvini o‘tkazish to‘g‘risidagi tashabbusini amalga oshirish yo‘lidagi amaliy qadamlardan biri bo‘ldi. Tashabbus yangi g‘oyalar va amaliy tavsiyalarni shakllantirish, shuningdek, uzoq muddatli hamkorlikni rivojlantirish uchun barqaror ekspert kanalini yaratishga qaratilgan. Forum Markaziy Osiyo xalqaro instituti (MOXI) va Tokio universiteti qoshidagi Osiyo istiqbolli tadqiqotlari instituti hamkorligida tashkil etildi. Forumning JIDUda o‘tkazilishi universitetning mintaqaviy va global rivojlanishning dolzarb masalalari bo‘yicha xalqaro ekspertlar va akademik muloqot maydoni sifatidagi muhim rolini ta’kidladi. Muhokamalar yakunida ishtirokchilar Yaponiya va Markaziy Osiyo mamlakatlari o‘rtasidagi ekspertlar hamkorligini yanada mustahkamlash, qo‘shma tadqiqotlarni rivojlantirish va davlat rahbarlari darajasida erishilgan kelishuvlarni amalga oshirish bo‘yicha amaliy tavsiyalarni shakllantirish zarurligini ta’kidladilar. Forum Yaponiya va Markaziy Osiyo o‘rtasidagi barqaror rivojlanish, o‘zaro bog‘liqlik, innovatsiyalar va inson kapitalini rivojlantirishga asoslangan uzoq muddatli sheriklikni rivojlantirish bo‘yicha fikr almashish va yangi yondashuvlarni ishlab chiqish uchun muhim maydonga aylandi.

109

23.09.2026

JIDUDA “ITALIYA FUQAROLIK HUQUQINING ASOSIY TAMOYILLARI” MAVZUSIDA MA’RUZA BO‘LIB O‘TDI

Joriy yilning 18-sentabr kuni Jahon iqtisodiyoti va diplomatiyasi universitetida (JIDU) Zoom platformasida onlayn formatda qiyosiy huquqshunoslikning fundamental mavzularidan biri — “Italiya fuqarolik huquqining asosiy tamoyillari”ga bag‘ishlangan ma’ruzasi bo‘lib o‘tdi. Ma’ruza davomida Italiya huquqiy tizimining tarixi va asosiy tamoyillari — uning kontinental (fuqarolik) huquqi asoslaridan ichki huquqdan xalqaro xususiy huquqqa o‘tishigacha — yoritib berildi. Tadbir “Fuqarolik huquqi va xalqaro xususiy huquq fanlari” kafedrasi o‘qituvchisi Alisher Bobonazarov moderator sifatida, shuningdek kafedra mudiri Sherzodbek Masadikov va professor Dilfuza Imamova ishtirok etdilar. Tadbirning ma’ruzachisi “Colasanti Law Firm” yuridik firmasi yuristi Mattias Ebner bo‘lib, u JIDU talabalari va professor-o‘qituvchilari bilan o‘z kasbiy tajribasi bilan o‘rtoqlashdi. Tadbirda universitet talabalari va professor-o‘qituvchilari faol ishtirok etib, muhokamani katta qiziqish bilan kuzatdilar va taqdim etilgan mavzular yuzasidan fikr almashdilar. Ma’ruzada qatnashgan faol ishtirokchilarga ishtirok sertifikati berildi. Ma’ruza davomida Italiya xususiy huquqining tarixiy rivojlanishi va tasnifiga alohida e’tibor qaratildi; u Rim huquqidan boshlanib, 1942-yildagi Fuqarolik kodeksi (Codice Civile)da qayta ishlangan. Ma’ruzachi meros huquqini, jumladan vasiyat erkinligi bilan majburiy merosxo‘rlarga tegishli majburiy ulushlar o‘rtasidagi muvozanatni; oila huquqini, ya’ni nikoh, alohida yashash, ajralish va turmush o‘rtoqlar mol-mulk rejimlarini; shuningdek, ashyoviy huquqni, jumladan mulk huquqi, egalik, egalik qilish muddati o‘tishi natijasida orttirish va asosiy cheklangan ashyoviy huquqlarni ko‘rib chiqdi. Ma’ruzaning yakuniy qismi Italiya xalqaro xususiy huquqiga bag‘ishlanib, unda transchegaraviy huquqiy munosabatlarda qo‘llaniladigan huquq va yurisdiksiya normalari yoritildi. Ushbu ma’ruza Barqaror rivojlanish maqsadlarining 4-maqsadi — “Sifatli ta’lim” g‘oyalariga hamohang bo‘lib, talabalarning xalqaro huquqiy ekspertiza va qiyosiy huquqshunoslik sohasidagi bilimlaridan foydalanish imkoniyatlarini kengaytiradi, shuningdek, 16-maqsad — “Tinchlik, adolat va samarali institutlar”, xususan, qonun ustuvorligini qo‘llab-quvvatlash va adolatga teng kirishni ta’minlashga qaratilgan 16.3-bandiga mos keladi. Tadbir, shuningdek, 17-maqsad — “Maqsadlar uchun hamkorlik”ni, xususan, muassasalar o‘rtasida xalqaro hamkorlikni mustahkamlash va bilim hamda tajriba almashishga oid 17.6-bandni aks ettiradi. Bunday ma’ruzalari talabalarning qiyosiy-huquqiy dunyoqarashini kengaytirishda va JIDU bilan xalqaro yuridik hamjamiyat o‘rtasidagi akademik aloqalarni mustahkamlashda muhim rol o‘ynaydi. Shubhasiz, bunday tadbirlar bo‘lajak mutaxassislarning huquqiy ongini oshirishga hamda nazariya va xalqaro amaliyot integratsiyasini mustahkamlashga xizmat qiladi.

104

21.09.2026

JIDU talabalari Dilbar Abdurahmonova xotirasiga bag‘ishlangan gala-konsertda ishtirok etdilar

JIDU Yuridik klinikasi talabalari va klinitsistlari Alisher Navoiy nomidagi O‘zbekiston davlat akademik katta teatrida buyuk san’atkor Dilbar Abdurahmonova xotirasiga bag‘ishlangan gala-konsertda ishtirok etdilar. Tashrif Yuridik klinika direktori Z.S. Ubaydullayev tashabbusi bilan tashkil etildi. Tadbir davomida talabalar san’at namoyandalarining ijodidan bahramand bo‘lib, madaniyat va san’atning shaxsiy hamda kasbiy rivojlanishdagi o‘rni haqida yanada chuqurroq tasavvurga ega bo‘ldilar. Mazkur tashabbus talabalarning madaniy dunyoqarashini kengaytirish va ularning har tomonlama rivojlanishini qo‘llab-quvvatlashga xizmat qildi.

191