Joriy yilning 16-aprel kuni Jahon iqtisodiyoti va diplomatiya universitetida (JIDU) Pokiston Islom Respublikasining O‘zbekistondagi Favqulodda va Muxtor elchisi Ahmad Farukning «Challenges and Opportunities for Cooperation between Central Asia and the South Asian Subcontinent» mavzusidagi ochiq ma’ruzasi bo‘lib o‘tdi.

Elchi o‘z nutqida asrlar davomida O‘zbekiston va Pokistonning hozirgi hududlarini bog‘lab kelgan hamda zamonaviy hamkorlikning tarixiy poydevorini yaratgan Buyuk Ipak yo‘lining karvon yo‘llarini alohida ta’kidlab o‘tdi.

So‘ngra diplomat zamonaviy kun tartibiga o‘tib, O‘zbekiston Respublikasi Prezidenti Shavkat Mirziyoyev va Pokiston Islom Respublikasi Bosh vaziri Shahboz Sharifning fevral oyida Toshkentda bo‘lib o‘tgan muzokaralari natijalarini ta’kidladi: rahbarlar siyosiy muloqotni faollashtirish va yaqin yillarda tovar ayirboshlash hajmini 2 milliard AQSH dollariga yetkazishga kelishib oldilar. Hozirning o‘zidayoq ikki tomonlama savdo o‘sib bormoqda: 2024-yil yakuniga ko‘ra uning hajmi 404 million dollarga yetdi, holbuki yetti yil avval bu ko‘rsatkich 40 million dollardan oshmagan edi.

A.Faruk O‘zbekiston uchun asosiy to‘siq sifatida dengizga chiqish imkoniyatining yo‘qligini ta’kidlab, aynan shu sababli tranzit infratuzilmasi loyihalari strategik ahamiyat kasb etayotganini ko‘rsatdi. Nutqning markaziy qismi Termez – Mozori Sharif – Kobul – Peshovar yo‘nalishi bo‘yicha quriladigan Transafg‘on temir yo‘liga bag‘ishlandi. Qurilish 2025-yilda boshlanishi rejalashtirilgan bo‘lib, O‘zbekiston Transport vazirligining hisob-kitoblariga ko‘ra, Pokiston portlariga yuklarni yetkazib berish vaqtini hozirgi taxminan 35 kundan 3-5 kungacha qisqartiradi.

Elchi ta’kidlaganidek, Markaziy va Janubiy Osiyo o‘rtasidagi transport, energetika va raqamli yo‘laklarni kengaytirish yagona iqtisodiy makonni yaratadi, har ikki mintaqaning investitsiyaviy jozibadorligini oshiradi va texnologiyalar almashinuvini tezlashtiradi.

Ma’ruzadan so‘ng, elchi Ahmad Faruk talabalarning savollariga batafsil javob berdi.