Joriy yilning 15-aprel kuni Jahon iqtisodiyoti va diplomatiya universitetida (JIDU) Vengriya xalqaro munosabatlar institutining bosh maslahatchisi va katta ilmiy xodimi, Ishtvan Secheni universiteti (Dyor, Vengriya) Mintaqaviy va iqtisodiy fanlar doktorlik maktabi dekani, doktor Vasha Lashlo bilan uchrashuv bo‘lib o‘tdi.

Uchrashuvda JIDU tomonidan akademik ishlar bo‘yicha birinchi prorektor Akram Umarov va Istiqbolli xalqaro tadqiqotlar instituti (IXTI) direktori o‘rinbosari Durbek Amanov ishtirok etdi.

Muzokaralar chog‘ida professor Vasha Lashlo kelgusida akademik va ilmiy hamkorlikka, xususan, JIDU talabalarini Ishtvan Secheni universitetining magistratura va doktorantura ta’lim dasturlariga jalb qilish yo‘nalishida hamkorlik qilishga tayyorligini tasdiqladi. Bundan tashqari, uning tomonidan akademik almashinuv doirasini kengaytirish va qo‘shma loyihalarni amalga oshirishni boshlash taklif qilindi, bu esa, mehmon ta’kidlaganidek, har ikki tomon talabalari va o‘qituvchilarining ilmiy va ta’lim faoliyati uchun qo‘shimcha istiqbollar ochadi.

JIDU prorektori Akram Umarov tadqiqotchi talabalar uchun almashinuv dasturlarini rivojlantirishga, jumladan, Vengriyada ilmiy ish olib borish uchun qisqa muddatli imtiyozlar imkoniyatiga qiziqish bildirdi. Muhokama doirasida u joriy yilning sentyabr oyida Vengriya va Markaziy Osiyo mamlakatlari o‘rtasidagi munosabatlarga bag‘ishlangan onlayn davra suhbati o‘tkazishni taklif qildi.

Har ikki tomon hamkorlikni davom ettirish, sheriklikni chuqurlashtirish va qo‘shma ilmiy nashrlarni amalga oshirish niyatini bildirdi. Shuningdek, Markaziy Osiyo, Markaziy va Sharqiy Yevropa mintaqalaridagi ijtimoiy-iqtisodiy jarayonlarni o‘rganishga qaratilgan tadqiqot dasturlarini ishlab chiqishga qiziqish bildirildi.

Tashrif doirasida professor Vasha Lasho universitet talabalari uchun “Bog‘liqlik tashqi siyosatda yangi yondashuv sifatida: Vengriya misolida” (Connectivity as a new foreign policy approach - the case of Hungary) mavzusida ochiq ma’ruza ham o‘tkazdi. Ma’ruza yakunida faol savol-javoblar qismi ham bo‘lib o‘tdi, unda talabalar mavzuga yuqori qiziqish bildirdilar va Vengriya tashqi siyosatining dolzarb jihatlarini muhokama qilish imkoniyatiga ega bo‘ldilar.