2025-yilning 29-mart kuni Jahon iqtisodiyoti va diplomatiya universitetida “Oʻzbek va rus tillari” kafedrasi va “Roman-german” kafedrasi  rahbarligida til ta’limi masalasi, tarjima  va o‘qitishning  zamonaviy usullariga  bag‘ishlangan “Tashqi siyosiy va tashqi iqtisodiy aloqalar uchun kadrlar tayyorlashda til ta'limi va tarjima masalalari" mavzusidagi XV anʼanaviy ilmiy-amaliy konferensiya bo‘lib o‘tdi.

Anjumanda JIDU Ilmiy ishlar va innovatsiyalar bo‘yicha prorektori G.S. Ismailova, professor-oʻqituvchilar, shuningdek,   Alisher Navoiy nomidagi o‘zbek tili va adabiyoti universiteti, Oʻzbekiston davlat jahon tillari universiteti mutaxassislari, tayanch doktorantlar, mustaqil-izlanuvchilar, konferensiya mavzusi doirasida ilmiy tadqiqot olib borayotgan yosh olimlar, shuningdek, magistrantlar ishtirok etdi.

Konferensiya O‘zbekiston Respublikasi Prezidentining 2022-yil 23-iyuldagi “Jahon iqtisodiyoti va diplomatiya universiteti faoliyatini tizimli isloh qilish chora-tadbirlari to‘g‘risida”gi PQ-330-sonli qarori ijrosini ta’minlash, JIDUda ilm-fanni yanada rivojlantirish, ilmiy tadqiqot ishlari samaradorligini oshirish, Oʻzbekiston Respublikasining tashqi iqtisodiy faoliyati va tashqi siyosati uchun malakali kadrlarni tayyorlashda ularning ilmiy salohiyatini muntazam ravishda oshirib borish maqsadida tashkil etildi.

G.S.Ismailova anjumanni ochib berib, o‘z nutqida shiddat bilan oʻzgarib borayotgan dunyo biz oʻqituvchilar hamda biz yetishtiradigan kadrlar oldiga katta talablar qoʻyayotganligini, endi shunchaki bilim toʻplash, eslab qolish, nazariy bilimlarga ega boʻlishning oʻzi yetarli emasligini, zamonaviy mutaxassis kadrlar nafaqat oʻz sohasining bilimdoni boʻlishi, balki kutilmagan vaziyatlarga moslashuvchan, ijodkor, mustaqil mushohada yurita bilish kabi xususiyatlarni egallashi zarurligi, shaxslararo va kasbiy muloqotga kirishishga tayyorlik ham zamonaviy mutaxassis uchun muhim ekanligini alohida ta’kidlab, ushbu anjumanda koʻtariladigan mavzular va bildiriladigan fikr-mulohazalar oliy taʼlim tizimida  til taʼlimi  muammolarining yechimini topishga yordam berishiga umid bildirib, anjuman ishiga muvaffaqiyat tiladi.

Ilmiy-amaliy konferensiya ishi davomida  jahon andozalari talabiga javob bera oladigan zamonaviy informatsion va pedagogik texnologiyalarni tatbiq etib, noan’anaviy va samarali o‘qitish usullarini yanada takomillashtirgan holda joriy etish, darslik va o‘quv qo‘llanmalarini takomillashtirish, yaratilgan yangi o‘quv qo‘llanmalar uchun uslubiy ko‘rsatmalar ishlab chiqish, yangi darslik va o‘quv qo‘llanmalarni o‘zaro almashish hamda aprobatsiyadan o‘tkazish, globallashuv jarayonida bir necha tillarni o‘qitish va tarjimonlar tayyorlash, sinxron tarjimani o‘quv dasturlariga kiritish, sinxron tarjima qila oladigan kadrlarni tarbiyalashga oid ilmiy-tadqiqot ishlanmalari, elektron manbalar yaratish va amaliyotga tatbiq etish bo‘yicha  xulosalar ishlab chiqildi.