Joriy yilning 26-mart kuni Jahon iqtisodiyoti va diplomatiya universitetida Mahmudxo‘ja Behbudiy tavalludining 150-yilligi munosabati bilan “Behbudiy asarlarida ma’rifat va taraqqiyot g‘oyalari” mavzusida munozara bo‘lib o‘tdi.

 Tadbirda jadidchilik harakati yetakchilaridan biri bo‘lgan dramaturg Mahmudxo‘ja Behbudiyning ijodi, ayniqsa uning yosh avlodni vatanparvarlik ruhida tarbiyalashdagi o‘rni, intellektual va ma’naviy salohiyatni oshirishdagi ahamiyati haqida talabalarning o‘zaro fikr-mulohazalari tinglandi. Xususan, uning 1911-yilda yozilgan “Padarkush” dramasi alohida e’tirof etildi. Ushbu asarda jaholat, ilmsizlik va tarbiyasizlikka qarshi ma’rifat ulug‘lanadi, o‘qimagan bolaning kelajagi va uning jamiyatga salbiy ta’siri yoritib beriladi.

 Munozara davomida Behbudiy asarlari orqali yoshlarning tarbiyasi, ta’limi va jamiyatdagi o‘rnini mustahkamlashda oilaviy muhitning ahamiyati muhokama qilindi. Shuningdek, Mahmudxo‘ja Behbudiy xotirasini abadiylashtirish, hayoti va faoliyatini chuqur tadqiq qilish, ilmiy va badiiy merosini keng targ‘ib etish borasida amalga oshirilayotgan ishlar ta’kidlab o‘tildi.