Joriy yilning 7 aprel kuni Jahon iqtisodiyoti va diplomatiya universitetida “Xorijiy davlatlarda intellektual mulk huquqi” mavzusida “Xalqaro huquq” fakulteti 3-kurs talabalari uchun va “Fuqarolik huquqi va xalqaro xususiy huquq fanlari” kafedrasi professor-o‘qituvchilari ishtirokida mahorat darsi bo‘lib o‘tdi.

Mahorat darsini o‘tkazish uchun intellektual huquq sohasi mutaxassisi, amaliyotchi yurist va asosiy faoliyati intellektual mulk huquqi, ommaviy axborot vositalari huquqi va IT-huquq bo‘lgan “Perspective Consulting” MChJ yuridik konsalting kompaniyasi rahbari Xamidov Ilhom Erkinovich taklif etildi.

Mahorat darsi doirasida Hamidov Ilhom xorijiy davlatlarda intellektual mulk obyektlarini tartibga soluvchi turli jihatlar bilan bog‘liq dolzarb masalalarni batafsil yoritib berdi.

Mahorat darsi davomida talabalar muhokama qilingan mavzularga faol qiziqish bildirishdi, intellektual huquqqa oid turli savollarni berishdi va mutaxassisdan batafsil javoblar olishdi.

Mazkur mahorat darsi Barqaror rivojlanish maqsadlari (BRM) 17 – “Barqaror rivojlanish yo‘lida hamkorlik”ga, xususan, 17.6-bandga muvofiq keladi. Bu band ilm-fan, texnologiya va innovatsiyalar sohasida xalqaro hamkorlikni mustahkamlash va ulardan foydalanish imkoniyatlarini kengaytirishni nazarda tutadi. Tadbir intellektual huquq sohasida xalqaro hamkorlikni rivojlantirish, bilim va tajriba almashish hamda ta’limiy imkoniyatlarni kengaytirishga xizmat qildi.

Mahorat darsi talabalarga yetakchi mutaxassisdan noyob tajriba orttirish imkonini beruvchi muhim ma’rifiy tadbirga aylandi, shuningdek, intellektual mulk huquqi sohasida akademik muloqotni rivojlantirish, ilmiy aloqalarni mustahkamlash va ta’lim jarayonini takomillashtirishga salmoqli hissa bo‘lib qo‘shildi.