Joriy yilning 21-noyabr kuni Toshkent davlat agrar universitetida O‘zbekiston Respublikasi Oila va xotin-qizlar qo‘mitasi, Toshkent shahar Olima ayollar uyushmasi, Jahon iqtisodiyoti va diplomatiya universiteti (JIDU), Tibbiyot akademiyasi bilan hamkorlikda “Yangi O‘zbekiston ayollari: bugun va istiqbolda’’ mavzusida vebinar tashkil etildi.

Olima ayollar mehnatini e’tirof etish, yosh izlanuvchilarni qo‘llab-quvvatlash va ilm-fanga keng jalb qilish, ilmiy salohiyatni yuksaltirish maqsadida tashkil qilingan tadbirda JIDU professor-o‘qituvchilari, tadqiqotchilar hamda talabalar ishtirok etdi.

Tadbirda Oila va xotin-qizlar qo‘mitasi raisi Ozoda Parpiboyeva so‘z olib, yurtimiz xotin-qizlarining jamiyat va davlat hayotidagi rolini kuchaytirish, ilm-fan bilan shug‘ullanishlari uchun ulkan imkoniyatlar yaratish ustuvor vazifa ekanligini ta’kidladi.  Yangi O‘zbekiston ayollari nafaqat oilada, balki mamlakat hayotining turli jabhalarida ibrat bo‘lib kelayotgani e’tirof etildi.

Siyosiy fanlar doktori, JIDU Xotin-qizlar masalalari bo‘yicha maslahat kengashi raisi, professor E’tibor Sultanova qizlar tarbiyasida bilim va kasbiy kelajak olg‘a surilishi, bilimli ayol jamiyat boyligi hamda quvvati ekanligi, shuningdek, xotin-qizlarning ilm-fan va diplomatiya sohasidagi o‘rni va erishayotgan yutuqlari haqida alohida ta’kidladi. U, ayniqsa, diplomatiya sohasida ayollarning faolligini oshirish, ularning xalqaro munosabatlarda ishtirokini kengaytirish hamda yetuk diplomat sifatida shakllanishiga ko‘mak berish muhimligini qayd etdi. Bundan tashqari, JIDU xotin-qizlar masalalari bo‘yicha maslahat kengashi raisi o‘z ilmiy yo‘li, Jahon iqtisodiyoti va diplomatiya universiteti talaba va bitiruvchi qizlari muvaffaqiyatlari haqida yosh qizlarga o‘z maslahatlarini, taklif va tavsiyalarini berdi.

Vebinar doirasida bir qator taniqli olimlar dolzarb mavzularda ma'ruzalar qildilar.