Joriy yilning 7-aprel kuni JIDU 1-kurs talabalari hamda “Adabiy mushohada” to‘garagi a’zolari  ulug‘ adib, shoir va jamoat arbobi  Oybek ijodi  bilan yaqindan tanishish hamda oybekshunos olimlar bilan uchrashish maqsadida uy-muzeyiga tashrif buyurishdi.

Ma’lumki, mamlakatimizning barcha tashkilotlarida, xususan JIDUda ham “BRM” doirasida bir qator ishlar amalga oshirilmoqda. Shu maqsadda tadbirga JIDUga biriktirilgan Mirzo Ulug‘bek tumanining “Olmachi”, “Yangi Olmachi”, “Elobod” mahalla fuqarolar yig‘inlaridan 10 nafar 18 yoshli  faol yoshlar ham taklif etildi.

Adabiy-ma’rifiy tadbirda mehmon sifatida Alisher Navoiy nomidagi Toshkent davlat o‘zbek tili va adabiyoti universiteti professori Abdulla Ulug‘ov ishtirok etdi. A.Ulug‘ov tomonidan Oybek ijodi labaratoriyasi, uning targ‘iboti  haqida qimmatli ma’lumotlar berildi. Uning “Qutlug‘ qon”, “Ulug‘ yo‘l” romanlarining qahramonlari prototipi haqida qiziqarli voqealar so‘zlab berildi. Ustozlik, ilmiy rahbarlik faoliyatidagi jarayonlar va ko‘rsatgan jonbozligi, fidoyiligi to‘g‘risida talabalarga o‘rnak bo‘ladigan faktlar berildi. Ijodkorga berilgan mukofotlarga to‘xtalib uning ijodiy merosi bundan-da buyuk taqdirlashlarga munosib ekanligini qayd etdi. To‘garak a’zolari bilan adabiy suhbat o‘tkazildi.

Oybek uy-muzeyi xodimasi M.Usmonova  “Kirish”, “Bolalik”, “Qutlugʻ qon”, “Navoiy”, “Abadiyat va umr”  deb  nomlangan 5 ta asosiy zal,  ish  kabineti va  Saidnosir  otaga bagʻishlangan  boʻlimlar bilan alohida tanishtirdi. Yozuvchining adib sifatidagi qizg‘in faoliyati bilan bir qatorda arboblik mahorati to‘g‘risida ham faktlar bilan axborot berdi. Talaba-yoshlar muzeyda 10 mingdan ortiq eksponat saqlanishini, qoʻlyozmalar, fotosuratlar, uy jihozlari, turli sanʼat asarlari va buyumlar ijodkorning bevosita o‘zi foydalangan va unga hadya qilingan buyumlar ekanini bilib olishdi. 

Tadbir so‘nggida talabalarga ijodkorning “Oltin vodiydan shabadalar” romani, “Namatak” to‘plami hamda Oybekning turmush o‘rtog‘i Zarifa Saidnosirovaning “Gul bargi” she’riy to‘plami, “Oybegim mening” avtobiografik risolasi esdalik sovg‘a sifatida berildi.