Joriy yilning 8-aprel kuni Jahon iqtisodiyoti va diplomatiya universiteti “Xalqaro iqtisodiyot va menejment” fakulteti talabalari va  “Ingliz tili” kafedrasi o‘qituvchilari tashabbusi bilan bolalar onkologiya shifoxonasiga tashrif buyurildi.

Mazkur tashrif keng ko‘lamli xayriya aksiyasi bilan yakunlandi.  Unda talabalar va o‘qituvchilar bolalarda oqqon kasalligi bilan bog‘liq muammolarga duch kelgan oltita oilani qo‘llab-quvvatlash jamg‘armasiga ehson qildilar. Ushbu tashabbus nafaqat og‘ir ahvolga tushib qolganlarga sezilarli yordam ko‘rsatishga, balki universitet muhitida hamjihatlik va o‘zaro yordam tuyg‘usini mustahkamlashga imkon yaratdi.

Og‘ir kasalliklarga chalingan oilalarga, ayniqsa, aholining zaif qatlamlariga hayotiy muhim ijtimoiy yordam ko‘rsatish nihoyatda muhim vazifa hisoblanadi.  JIDU talabalari va o‘qituvchilarining ijtimoiy himoya va sog‘liqni saqlashning global tamoyillariga sadoqati ularning adolat prinsiplariga hamda qiyin ahvolga tushib qolgan insonlarga nisbatan mehr-shafqat ko‘rsatishga bo‘lgan fidoyiligini namoyon etadi.