Ta'limning yuqori sifati

Jahon iqtisodiyoti va diplomatiya universitetining bakalavriat dasturlari talabalarda global jarayonlarni chuqur anglash, murakkab masalalarni tahlil qilish hamda xalqaro darajada samarali faoliyat yuritish uchun zarur bo‘lgan fundamental bilim, amaliy ko‘nikma va zamonaviy dunyoqarashni shakllantiradi. Ta’lim jarayoni nazariy bilimlar, amaliy tayyorgarlik va fanlararo yondashuv uyg‘unligida tashkil etilgan. Bakalavriat bosqichida universitet quyidagi asosiy ta’lim yo‘nalishlarini taklif etadi: Xalqaro munosabatlar; Siyosatshunoslik; Jahon iqtisodiyoti va xalqaro iqtisodiy munosabatlar; Xalqaro-huquqiy faoliyat yo‘nalishidagi yurisprudensiya. Har bir dastur davlat boshqaruvi, diplomatiya, xalqaro hamkorlik, tahliliy faoliyat va zamonaviy mehnat bozori ehtiyojlarini hisobga olgan holda ishlab chiqilgan. Asosiy kompetensiyalar JIDU bakalavriat dasturlari bitiruvchilarda quyidagi kompetensiyalarni shakllantiradi: analitik va tanqidiy fikrlash; xalqaro siyosiy, iqtisodiy va huquqiy jarayonlarni tushunish; dalillarga asoslangan qaror qabul qilish; tadqiqot olib borish va ma’lumotlar bilan ishlash; professional yozma va og‘zaki muloqot; madaniyatlararo hamkorlik; hamda davlat, xususiy va xalqaro sektorlar uchun zarur bo‘lgan amaliy kasbiy tayyorgarlik. Ta’lim jarayonida talabalar akademik mobillik dasturlari, amaliyot, yetakchi mutaxassislar va ekspertlar bilan uchrashuvlar, ilmiy izlanishlar hamda loyiha faoliyati orqali o‘z bilim va ko‘nikmalarini amaliy muhitda rivojlantiradilar. Bu esa ularda mustaqil fikrlash, moslashuvchanlik, strategik yondashuv va professional mas’uliyatni yanada kuchaytiradi. Natijada bitiruvchilar milliy va xalqaro darajada raqobatbardosh, tashabbuskor, zamonaviy va yuqori malakali mutaxassislar sifatida shakllanadilar. Universitetda talabalarga ikkinchi xorijiy til sifatida 12 ta til ichidan tanlov qilish imkoniyati ham yaratilgan. Quyida bakalavriat dasturlari bilan tanishishingiz mumkin. Til yo‘nalishidagi fanlar Sillabus: Rus tili I,II (2025) Sillabus: O‘zbek tili I , II (2025) SHARQ TILLARI SILLABUSLARI (Barcha ta’lim yo‘nalishlari uchun) 2025 Ikkinchi chet tili sillabuslari, 2025/26 (Romano-german tillari) 2025/26 Ta’lim dasturlari bo‘yicha o‘quv jadvallari 2025/2026 o‘quv yili uchun akademik kalendar va amaliyot jadvali

Batafsil

JIDU'da o'qing

Jahon iqtisodiyoti va diplomatiya universiteti 1992-yil 23-sentabrda tashkil etilgan boʻlib, Oʻzbekiston Respublikasi Tashqi ishlar vazirligi qoshida faoliyat yuritadi.

Bu oliy taʼlim muassasasi boʻlib, mutaxassislar va ilmiy kengashni tayyorlash, qayta tayyorlash va ularning malakasini oshirish hamda quyidagi yoʻnalishlarda yuqori darajadagi fundamental va amaliy tadqiqotlar olib boradi:

Xalqaro iqtisodiyot va menejment;
Xalqaro munosabatlar va siyosatshunoslik;
Xalqaro ommaviy va xususiy huquq;
Yurisprudensiya.

Batafsil

Yangiliklar

Barcha yangiliklar

01.11.2026

“Bank faoliyatini huquqiy tartibga solish” mavzusida mahorat darsi o'tkazildi

2026-yil 31-oktabr kuni Jahon iqtisodiyoti va diplomatiya universitetida “Moliya va soliq huquqi” fanidan “Bank faoliyatini huquqiy tartibga solish” mavzusida Xalqaro-huquqiy va ommaviy-huquqiy fanlar kafedrasi o‘qituvchisi N. B. Uzakbayeva rahbarligida mahorat darsi o'tkazildi. Mahorat darsining spikeri – “Ipoteka-bank” ATIB Umumiy huquqiy qo'llab-quvvatlash departamenti katta yuriskonsulti Jalol Qahramonovich Imamov bo‘ldi. Mahorat darsi doirasida banklar faoliyati, bank faoliyatini tartibga soluvchi qonun hujjatlari va bank siri institutining huquqiy asoslari o‘rganildi. Talabalarga bank tizimida qo‘llaniladigan huquqiy mexanizmlar va bank mijozlarining huquqlarini himoya qilish tartibi tushuntirildi. Shuningdek, bugungi kunda dolzarb bo'lgan moliyaviy firibgarlik holatlariga alohida e’tibor qaratildi. Xususan, bank kartasidan mablag‘lar o‘g‘irlanganda yoki fuqaro nomiga uning roziligisiz kredit rasmiylashtirilganda bank qanday yo‘l tutishi, shuningdek, bankning davlat organlari bilan hamkorlik qilish tartibi amaliy misollar asosida yoritildi. Ishtirokchilar amaliyotchi mutaxassisga o‘zlarini qiziqtirgan savollarni berish, bank amaliyotidagi dolzarb muammolarni muhokama qilish va moliyaviy firibgarlikka qarshi kurashish sohasidagi zamonaviy yondashuvlar bilan tanishish uchun noyob imkoniyatga ega bo'ldilar. Ushbu tadbir bo‘lajak huquqshunoslarning kasbiy tayyorgarligini oshirish hamda talabalarning moliya huquqi va moliyaviy xavfsizlik sohasidagi bilim va ko'nikmalarini rivojlantirishga qaratilgan. Shu bilan birga, o'tkazilgan tadbir Barqaror rivojlanish maqsadlariga erishish bilan bevosita bog'liq, xususan: talabalarda bank huquqi sohasida zamonaviy bilim va amaliy kompetensiyalarni shakllantirish orqali sifatli ta'limni ta'minlash (4-BRM); moliyaviy savodxonlikni oshirish va bank xizmatlaridan xavfsiz foydalanishni o'rgatish orqali moliyaviy xizmatlardan foydalanish imkoniyatini kengaytirish (8-BRM); moliyaviy firibgarlikka qarshi kurashish hamda bank va davlat organlari hamkorligini mustahkamlash orqali tinchlik, odil sudlov va samarali institutlarni mustahkamlashga ko'maklashish (16-BRM); shuningdek, oliy ta'lim muassasasi va bank sektori o'rtasidagi hamkorlikni rivojlantirish (17-BRM). Natijada, o‘tkazilgan tadbir aholining moliyaviy savodxonligini oshirish, bank xizmatlari iste'molchilarining huquqlarini himoya qilish amaliyotini takomillashtirish, shuningdek, ta'lim va bank amaliyoti o'rtasidagi aloqani mustahkamlashda muhim ahamiyat kasb etadi.

01.11.2026

JIDUda koreys tili va madaniyatiga bag‘ishlangan tadbirlar bo‘lib o‘tdi

2026-yil 22–30-oktabr kunlari Jahon iqtisodiyoti va diplomatiya universitetida Koreys yozuvi kuni (Hangil) munosabati bilan koreys tili va madaniyatini keng targ‘ib etishga qaratilgan qator madaniy-ma’rifiy tadbirlar tashkil etildi. Tadbirlar tashkilotchisi Jahon iqtisodiyoti va diplomatiya universitetining Sharq tillari kafedrasi bo‘ldi. Tadbirlarning asosiy maqsadi talabalarning koreys tilini o‘rganishga bo‘lgan qiziqishini oshirish, ularni koreys yozuvining o‘ziga xos xususiyatlari, milliy an’analari va madaniy merosi bilan yaqindan tanishtirish, shuningdek, interaktiv tanlovlar va qiziqarli o‘yinlar orqali madaniyatlararo muloqot ko‘nikmalarini rivojlantirishdan iborat bo‘ldi. Tadbirlarda universitetning 2–3-bosqich talabalari faol ishtirok etib, o‘zlarining til bo‘yicha bilimlari, ijodiy qobiliyatlari, topqirligi hamda jamoada ishlash ko‘nikmalarini namoyon etish imkoniyatiga ega bo‘ldilar. Dastur doirasida kafedra o‘qituvchilari tomonidan turli interaktiv va intellektual tanlovlar tashkil etildi. Dilnoza Nasullayeva tomonidan pantomima tanlovi o‘tkazilib, unda talabalar koreys tilidagi so‘z va iboralarni imo-ishoralar hamda harakatlar orqali tushuntirdilar. Mazkur mashg‘ulot ishtirokchilarning muloqot ko‘nikmalari va obrazli fikrlash qobiliyatini rivojlantirishga xizmat qildi. Olmos Niyozova bo‘g‘inlardan so‘z tuzish bo‘yicha tanlov tashkil etib, talabalarning lug‘at boyligini kengaytirish, til sezgirligi va tezkor fikrlash ko‘nikmalarini rivojlantirishga e’tibor qaratdi. Anastasiya Tsoy tomonidan savol-javob shaklidagi intellektual viktorina o‘tkazildi. Ushbu tanlov talabalarga koreys tili, Koreya tarixi va madaniyatiga oid bilimlarini sinovdan o‘tkazish hamda yanada boyitish imkonini berdi. Guzal Nurmatova talabalarni koreys xalqining an’anaviy milliy o‘yinlari bilan tanishtirdi. Mazkur o‘yinlar jamoaviy hamkorlikni mustahkamlash, ishtirokchilar o‘rtasida faol muloqotni rivojlantirish va madaniy tajriba almashish uchun qulay muhit yaratdi. Tadbirlar davomida talabalar yuqori faollik va qiziqish namoyon etib, topshiriqlarni bajarishda ijodiy yondashdilar hamda koreys tili bo‘yicha egallagan bilimlarini amaliyotda qo‘llash imkoniyatiga ega bo‘ldilar. Bunday madaniy-ma’rifiy tadbirlar talabalarning dunyoqarashini kengaytirish, madaniyatlararo muloqotni mustahkamlash, xorijiy tillarni o‘rganishga bo‘lgan qiziqishni oshirish hamda yoshlarni boshqa xalqlarning boy madaniy merosi bilan yaqindan tanishtirishga xizmat qiladi.

01.11.2026

JIDU talabalari “ India Up Close: Threads of the Silk Road” madaniyat festivalida ishtirok etdilar

2026-yil 31-oktabr kuni Jahon iqtisodiyoti va diplomatiya universiteti (JIDU) Xalqaro munosabatlar va Xalqaro huquq fakultetlari talabalari ingliz tili kafedrasi o‘qituvchisi Nargiza Voxidova hamrohligida “India Up Close: Threads of the Silk Road”nomli madaniyat festivalida ishtirok etdilar. Tadbir Hindistonning Toshkent shahridagi elchixonasi tomonidan tashkil etilib, Hindiston madaniyati va an’analarining boyligi hamda rang-barangligini namoyish etishga qaratildi. Festival doirasida Hindistonning madaniy merosini aks ettiruvchi turli madaniy chiqishlar va interaktiv mashg‘ulotlar tashkil etildi. Dasturdan tabla jo‘rligida ijro etilgan an’anaviy hind raqslari, yoga va meditatsiya mashg‘ulotlari, mehendi va rangoli bo‘yicha mahorat darslari, shuningdek, hind modasi va milliy taomlari namoyishlari o‘rin oldi. Tashrif buyuruvchilar mashhur Bollivud qo‘shiqlari, raqs chiqishlari hamda turli an’anaviy hind taomlaridan ham bahramand bo‘ldilar. Bayramona muhit, rang-barang chiqishlar va madaniy jarayonlarda bevosita ishtirok etish imkoniyati festivalni talabalar uchun ayniqsa mazmunli va qiziqarli tajribaga aylantirdi. Musiqa, raqs, san’at va milliy taomlar orqali ular Hindistonning madaniy an’analari hamda zamonaviy madaniy hayoti bilan yaqindan tanishish imkoniga ega bo‘ldilar. Bunday xalqaro madaniy tadbirlarda ishtirok etish talabalarning dunyoqarashini kengaytirish, madaniyatlararo anglashuvni rivojlantirish va madaniy xilma-xillikka hurmat ruhini shakllantirishda muhim ahamiyat kasb etadi. Xalqaro munosabatlar va huquq sohasining bo‘lajak mutaxassislari uchun turli madaniy an’analar bilan bevosita tanishish xalqaro hamkorlik va diplomatiyaning madaniy jihatlarini chuqurroq anglashga ham xizmat qiladi. Mazkur festival xalqlar o‘rtasidagi do‘stlik va o‘zaro anglashuvni mustahkamlashda madaniy diplomatiya hamda ta’lim sohasidagi almashinuvlarning muhim o‘rnini yana bir bor namoyon etdi.