Test Title

Test Title

    JIDUda Yaponiyaning oltita yetakchi universiteti vakillari ishtirokida ta’lim imkoniyatlari taqdimoti bo‘lib o‘tdi

    JIDUda Yaponiyaning oltita yetakchi universiteti vakillari ishtirokida ta’lim imkoniyatlari taqdimoti bo‘lib o‘tdi

    2026-yil 26-oktabr kuni Jahon iqtisodiyoti va diplomatiya universitetiga (JIDU) Yaponiyaning oltita yetakchi oliy ta’lim muassasasi vakillari tashrif buyurdi. Tashrif doirasida ta’lim dasturlari, akademik mobillik imkoniyatlari, grant va stipendiyalar, shuningdek, Yaponiyada ta’limni davom ettirish hamda kasbiy rivojlanish istiqbollariga bag‘ishlangan taqdimot tashkil etildi. Tadbirda Yaponiyaning quyidagi universitetlari vakillari ishtirok etdi: 1. University of Tsukuba — Tsukuba universiteti; 2. Nagoya University — Nagoya universiteti; 3. Yokohama National University — Yokohama milliy universiteti; 4. The Graduate University for Advanced Studies (SOKENDAI) — Ilg‘or tadqiqotlar oliy universiteti; 5. Kobe University — Kobe universiteti; 6. Nagaoka University of Technology — Nagaoka texnologiya universiteti. Taqdimotlar davomida Yaponiya oliy ta’lim muassasalari vakillari JIDU talabalarini mamlakat oliy ta’lim tizimining o‘ziga xos jihatlari, magistratura va doktorantura dasturlariga qabul shartlari, ingliz tilida tahsil olish, xalqaro akademik almashinuv dasturlarida ishtirok etish hamda ilmiy tadqiqotlar olib borish imkoniyatlari bilan tanishtirdi. Xususan, Tsukuba universiteti vakillari universitetning ta’lim va ilmiy tadqiqot yo‘nalishlari, shuningdek, Markaziy Osiyo mamlakatlari talabalari uchun mo‘ljallangan maxsus dasturlar haqida ma’lumot berdi. Davlat siyosati sohasidagi magistratura dasturi hamda ta’lim xarajatlarini moliyaviy qo‘llab-quvvatlashni nazarda tutuvchi The Nippon Foundation Central Asia Fellowship (NipCA) xalqaro stipendiya dasturiga alohida e’tibor qaratildi. Nagoya universiteti vakillari bakalavriat, magistratura va doktorantura bosqichlarida ingliz tilida ta’lim olish imkonini beruvchi G30 International Programs xalqaro ta’lim dasturini taqdim etdi. Shuningdek, NUPACE akademik almashinuv dasturi, stipendiyalar olish imkoniyatlari va bitiruvchilarning kelgusidagi bandlik istiqbollari haqida ma’lumot berildi. Yokohama milliy universiteti vakillari iqtisodiyot, boshqaruv, xalqaro taraqqiyot, muhandislik va huquq sohalaridagi ta’lim dasturlari haqida so‘z yuritdi. Xorijiy talabalar uchun yaratilgan ta’lim sharoitlari, akademik qo‘llab-quvvatlash tizimi hamda Yaponiya kompaniyalarida kasbiy faoliyatni yo‘lga qo‘yish imkoniyatlariga alohida e’tibor qaratildi. Ilg‘or tadqiqotlar oliy universiteti (SOKENDAI) vakillari fundamental va fanlararo ilmiy tadqiqotlar olib borishga yo‘naltirilgan doktorantura dasturlarini taqdim etdi. Ishtirokchilar xalqaro ilmiy hamkorlik, zamonaviy tadqiqot infratuzilmasi, shuningdek, yosh olimlar uchun mo‘ljallangan grant va stipendiya dasturlari haqida ma’lumot oldi. Kobe universiteti vakillari talabalarni huquq, iqtisodiyot, biznes boshqaruvi va xalqaro hamkorlik kabi yo‘nalishlardagi ingliz tilida olib boriladigan magistratura hamda doktorantura dasturlari bilan tanishtirdi. Xalqaro akademik hamkorlik, xorijiy talabalarni qo‘llab-quvvatlash va ularning kasbiy rivojlanishiga ko‘maklashish imkoniyatlari ham yoritildi. Tadbirning asosiy mavzularidan biri Yaponiyada ta’limni tamomlagandan so‘ng ishga joylashish va kasbiy o‘sish istiqbollari bo‘ldi. Universitetlar vakillari amaliyot o‘tash, ilmiy tadqiqot faoliyatini davom ettirish hamda xorijiy bitiruvchilarning kasbiy salohiyatini ro‘yobga chiqarish imkoniyatlari haqida ma’lumot berdi. Bunday tadbirlarning tashkil etilishi JIDUning xalqaro ta’lim aloqalarini kengaytirish, talabalar akademik mobilligini oshirish hamda Yaponiyaning yetakchi oliy ta’lim muassasalari bilan hamkorlikni mustahkamlashga xizmat qiladi. Mazkur uchrashuv universitet talabalari uchun Yaponiya oliy ta’lim muassasalari vakillaridan bevosita ma’lumot olish, istiqbolli ta’lim yo‘nalishlari bilan tanishish hamda kelgusidagi akademik va kasbiy rivojlanish imkoniyatlarini belgilab olishda muhim ahamiyat kasb etdi.

    JIDU o‘qituvchisi O‘zbekiston taraqqiyotining yettita ustuvor yo‘nalishi bo‘yicha ma’ruza qildi

    JIDU o‘qituvchisi O‘zbekiston taraqqiyotining yettita ustuvor yo‘nalishi bo‘yicha ma’ruza qildi

    Jahon iqtisodiyoti va diplomatiya universiteti “Xalqaro munosabatlar” kafedrasi o‘qituvchisi Javlon Abdurasulov Toshkent shahri Mirzo Ulug‘bek tumanidagi “Yangi Avayxon” mahallasida joylashgan 272-sonli umumta’lim maktabida tashkil etilgan “Uch avlod uchrashuvi” nomli ma’naviy-ma’rifiy tadbirda ishtirok etdi. Tadbir doirasida O‘zbekiston Respublikasi Prezidenti Shavkat Mirziyoyevning mamlakatimiz davlat mustaqilligining 35 yilligiga bag‘ishlangan nutqida belgilab berilgan yettita ustuvor yo‘nalish, ularning mazmun-mohiyati hamda mamlakatimizning kelgusi taraqqiyotidagi ahamiyati muhokama qilindi. Javlon Abdurasulov o‘z ma’ruzasida bilim va malakani mamlakatimiz kelgusi taraqqiyotining asosiy kapitaliga aylantirishga qaratilgan milliy dasturga alohida to‘xtalib, ta’lim va ilm-fanni rivojlantirish, yoshlarning intellektual salohiyatini yuksaltirish hamda zamonaviy bilim va ko‘nikmalarni egallashlari uchun keng imkoniyatlar yaratish muhimligini ta’kidladi. Ma’ruza davomida zamonaviy bilim va kasbiy kompetensiyalar mamlakatning raqobatbardoshligini oshirish, innovatsion rivojlanishni jadallashtirish hamda yoshlarning jamiyatda munosib o‘rin egallashida muhim omil ekani qayd etildi. Shuningdek, yoshlarni mustaqil va tanqidiy fikrlashga, doimiy izlanishga, zamonaviy texnologiyalarni puxta o‘zlashtirishga hamda milliy qadriyatlarga hurmat ruhida tarbiyalash masalalariga alohida e’tibor qaratildi. Tadbir yakunida ishtirokchilar o‘rtasida ta’lim sifatini oshirish, bilimli, malakali va ma’naviy yetuk yosh avlodni tarbiyalash, shuningdek, mamlakatimizning barqaror taraqqiyotiga munosib hissa qo‘shish masalalari yuzasidan fikr almashildi.

    JIDUda Adham Rasulov tavalludining 80 yilligiga bag‘ishlangan tantanali tadbir bo‘lib o‘tdi

    JIDUda Adham Rasulov tavalludining 80 yilligiga bag‘ishlangan tantanali tadbir bo‘lib o‘tdi

    2026-yil 24-oktabr kuni Jahon iqtisodiyoti va diplomatiya universitetida universitet dotsenti, diplomat va tajribali ustoz Adham G‘ofurovich Rasulov tavalludining 80 yilligiga bag‘ishlangan tantanali tadbir bo‘lib o‘tdi. Tadbirda diplomatik korpus vakillari, taniqli olimlar, hamkasblar, universitet professor-o‘qituvchilari, bitiruvchilari va talabalari, shuningdek, yubilyarning yaqinlari hamda shogirdlari ishtirok etdi. Tantanali uchrashuv Adham Rasulovning ko‘p yillik kasbiy faoliyati, diplomatik xizmat rivojiga qo‘shgan hissasi, yuqori malakali mutaxassislar tayyorlash va yosh avlodni tarbiyalash borasidagi xizmatlarini e’tirof etishga bag‘ishlandi. Tadbir davomida yubilyarning hayot yo‘li, kasbiy faoliyati va erishgan yutuqlariga bag‘ishlangan videolavha namoyish etildi. Mehmonlar uning tarjimayi holidagi muhim bosqichlar, diplomatiya va oliy ta’lim rivojiga qo‘shgan hissasi bilan yaqindan tanishdilar. Tadbirda O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev tabrik nutqi bilan so‘zga chiqdi. U o‘z nutqida yubilyarning kasbiy xizmatlari, tanlagan sohasiga sadoqati hamda bo‘lajak diplomatlarni tayyorlashdagi muhim o‘rnini alohida ta’kidladi. Tantanali tadbirning muhim lahzalaridan biri yubilyarni taqdirlash marosimi bo‘ldi. O‘zbekiston Respublikasi tashqi ishlar vazirining birinchi o‘rinbosari Bahromjon A’loyev Adham Rasulovga uning ko‘p yillik samarali faoliyati va O‘zbekiston diplomatik xizmati rivojiga qo‘shgan salmoqli hissasi e’tirofi sifatida “Diplomatik xizmat fidoyisi” ko‘krak nishonini topshirdi. Shuningdek, O‘zbekiston Respublikasi Oliy Majlisi Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi Alisher Agzamxo‘jayev ham tabrik nutqi bilan ishtirok etdi. U yubilyarni 80 yoshlik tavallud ayyomi bilan samimiy qutladi. Yubilyar sha’niga samimiy tabrik va minnatdorlik so‘zlari MDH Bosh kotibining o‘rinbosari, o‘zbekistonlik diplomat Ilhomjon Ne’matov, shuningdek, hamkasblar, shogirdlar va akademik hamjamiyat vakillari tomonidan ham bildirildi. Dasturda xorijiy davlatlarda faoliyat yuritayotgan O‘zbekiston elchilarining videomurojaatlari alohida o‘rin egalladi. Ularda yubilyarga samimiy minnatdorlik izhor etilib, mustahkam sog‘liq, farovonlik va uzoq umr tilaklari bildirildi. Uchrashuv doirasida kitobning qisqacha taqdimoti ham o‘tkazildi. Ishtirokchilar Adham Rasulov bilan birgalikdagi faoliyatiga oid xotiralari bilan o‘rtoqlashib, uning yuksak insoniy fazilatlari, boy kasbiy tajribasi va ustozlik faoliyatini alohida e’tirof etdilar. O‘z navbatida, yubilyar universitet rahbariyati, hamkasblari, do‘stlari va barcha ishtirokchilarga ko‘rsatilgan e’tibor, samimiy tabriklar hamda ko‘p yillik qo‘llab-quvvatlov uchun minnatdorlik bildirdi. Tantanali dastur badiiy qism bilan davom etdi. Mehmonlar uchun yubilyarning qizi Lola Rasulova fortepianoda musiqiy asar ijro etdi. Musiqiy chiqishlar tadbirga o‘zgacha samimiy va ko‘tarinki ruh bag‘ishladi. Tantanali uchrashuv iliq va do‘stona muhitda o‘tib, ilm-fan, ta’lim va diplomatiya sohalariga ko‘p yillik fidokorona xizmat qilishning yuksak ahamiyatini yana bir bor namoyon etdi.

    JIDUda Xalqaro gumanitar huquqning dolzarb masalalari bo‘yicha master-klass o‘tkazildi

    JIDUda Xalqaro gumanitar huquqning dolzarb masalalari bo‘yicha master-klass o‘tkazildi

    2026-yil 24-oktabr kuni Jahon iqtisodiyoti va diplomatiya universitetida Sarbon universiteti professori, yuridik fanlar doktori, O‘zbekiston xalqaro huquq assotsiatsiyasi raisi Ravshan Tulkunovich Xakimovning «BMTning O‘zbekistondagi Rivojlanish deklaratsiyasi va zamonaviy xalqaro gumanitar huquqning dolzarb masalalari» mavzusidagi master-klassi bo‘lib o‘tdi. Tadbir Xalqaro huquq fakulteti 4-kurs talabalari uchun «Xalqaro gumanitar huquq» tanlov kursi doirasida o‘tkazildi. Uni «Xalqaro huquq va ommaviy-huquqiy fanlar» kafedrasi dotsenti Sh.M. Xamdamova tashkil etdi. O‘z ma’ruzasida professor R.T. Xakimov xalqaro gumanitar huquq (XGH) bilan barqaror rivojlanish, inson huquqlarini himoya qilish va tinchlikni ta’minlash vazifalari o‘rtasidagi o‘zaro bog‘liqlikni tahlil qildi. U XGH normalari qurolli mojarolar sharoitida insonni himoya qilishning samarali vositasi bo‘lib qolayotganini ta’kidladi. Professor XGH bugungi kunda duch kelayotgan muammolarga ham to‘xtalib o‘tdi. Xalqaro amaliyotdan misollar keltirib, gumanitar normalar qanday qo‘llanilishini va ularni buzganlik uchun qanday javobgarlik mexanizmlari mavjudligini ko‘rsatib berdi. Talabalar bilan muloqotga alohida e’tibor qaratildi. Master-klass davomida ular XGHning dolzarb masalalari, jumladan tinch aholini himoya qilish, qurolli mojarolar ishtirokchilarining huquqiy maqomi hamda XGH normalarini buzganlik uchun javobgarlik bo‘yicha savollar berdi. Bunday uchrashuvlar xalqaro huquqshunoslar tayyorlashda muhim ahamiyatga ega. Ular talabalarga huquqiy normalarni o‘rganishdan ularni anglash va amalda qo‘llashga o‘tishga yordam beradi. Yetakchi olim va amaliyotchilar bilan muloqot kasbiy dunyoqarashni kengaytiradi, tahliliy fikrlash va dalillash ko‘nikmalarini rivojlantiradi. Shuningdek, bunday tadbirlar universitetning ilmiy va kasbiy hamjamiyat bilan aloqalarini mustahkamlaydi.

    JIDU talabalari Islom sivilizatsiyasi markaziga tashrif buyurdilar

    JIDU talabalari Islom sivilizatsiyasi markaziga tashrif buyurdilar

    2026-yil 23-oktabr kuni Jahon iqtisodiyoti va diplomatiya universiteti Xalqaro munosabatlar fakulteti 1-kurs talabalari «Dinshunoslik» fani doirasida Toshkent shahridagi Islom sivilizatsiyasi markaziga tashrif buyurdilar. Tashrif fan o‘qituvchilari Sobirjonova Moxlaroy va Nigina Qushayeva boshchiligida tashkil etildi. Tashrifdan ko‘zlangan asosiy maqsad talabalarning islom sivilizatsiyasi tarixi, Sharq mutafakkirlarining ilmiy-ma’naviy merosi hamda jahon sivilizatsiyasi taraqqiyotiga qo‘shgan hissasi haqidagi bilimlarini chuqurlashtirishdan iborat bo‘ldi. Tashrif davomida talabalar Markaz ekspozitsiyalari bilan tanishib, islom sivilizatsiyasining shakllanishi va rivojlanishi, uning ilm-fan, falsafa, madaniyat va ma’naviyat taraqqiyotidagi o‘rni haqida ma’lumot oldilar. Shuningdek, Sharq olimlari va mutafakkirlarining jahon ilm-fani rivojiga qo‘shgan hissasi, ularning ilmiy qarashlari va boy merosiga alohida e’tibor qaratildi. Mazkur tashrif «Dinshunoslik» fanida o‘rganilayotgan mavzularni amaliy bilimlar bilan boyitish, talabalarning tarixiy-madaniy dunyoqarashini kengaytirish hamda islom sivilizatsiyasining jahon taraqqiyotidagi o‘rnini chuqurroq anglashlariga xizmat qildi.

    JIDUda “Yashil isteʼmol – sogʻlom hayot sari qadam” mavzusida davra suhbati boʻlib oʻtdi

    JIDUda “Yashil isteʼmol – sogʻlom hayot sari qadam” mavzusida davra suhbati boʻlib oʻtdi

    Joriy yilning 23-oktyabr kuni Jahon iqtisodiyoti va diplomatiya universitetida Oʻzbekiston Ekologik partiyasi va JIDU Xotin-qizlar masalalari boʻyicha maslahat kengashi hamkorligida “Yashil isteʼmol – sogʻlom hayot sari qadam” mavzusida davra suhbati tashkil etildi. Tadbir Birlashgan Millatlar Tashkilotining Barqaror rivojlanish maqsadlari (BRM) doirasida oʻtkazilib, unda sogʻlom turmush tarzi, gender tengligi, masʼuliyatli isteʼmol va atrof-muhitni muhofaza qilish masalalari muhokama qilindi. Tadbirni JIDU Xotin-qizlar masalalari boʻyicha maslahat kengashi raisi, professor E. Sultanova kirish soʻzi bilan ochib berdi. E.Sultanova ekologik madaniyatni shakllantirish, yoshlar va xotin-qizlar orasida ongli, masʼuliyatli isteʼmol koʻnikmalarini rivojlantirish barqaror taraqqiyotning muhim omili ekanini taʼkidladi. Davra suhbatida Oliy Majlis Qonunchilik palatasi deputatlari, Ekologik partiya vakillari, mutaxassislar, universitet professor-oʻqituvchilari va talabalari ishtirok etdi. Maʼruzalarda yashil isteʼmol va ekologik transformatsiya, ekologik omillarning xotin-qizlar salomatligiga taʼsiri hamda sogʻlom turmush tarzini shakllantirish masalalari yoritildi. Maʼruzalardan soʻng savol-javob tarzida qizgʻin muhokama boʻlib oʻtdi. Talabalar ekologik muammolar, kundalik hayotda resurslardan oqilona foydalanish va sogʻliqni asrash boʻyicha oʻz fikr va takliflarini bildirdilar. Ishtirokchilar bunday tadbirlar yoshlar, xususan, xotin-qizlarning ekologik ongini yuksaltirish va Barqaror rivojlanish maqsadlariga erishishdagi faol ishtirokini taʼminlashga xizmat qilishini qayd etdilar.

    JIDUda startap loyihalarning navbatdagi taqdimoti bo‘lib o‘tdi

    JIDUda startap loyihalarning navbatdagi taqdimoti bo‘lib o‘tdi

    Joriy yilning 23-oktabr kuni Jahon iqtisodiyoti va diplomatiya universiteti talabalari ishtirokida innovatsion g‘oyalar va startap loyihalarning navbatdagi taqdimoti tashkil etildi. Tadbir davomida yangi ishtirokchilar o‘zlarining innovatsion g‘oyalari, texnologik yechimlari va startap loyihalarini namoyish etdilar. Talabalar loyihalarning asosiy maqsadlari, amaliy ahamiyati, mavjud muammolarga taklif etilayotgan yechimlar hamda kelgusidagi rivojlanish istiqbollari haqida ma’lumot berdilar. Taqdimotlar davomida har bir loyihaning innovatsion salohiyati, amaliyotga tatbiq etish imkoniyatlari va rivojlanish istiqbollari muhokama qilindi. Shuningdek, ishtirokchilarga o‘z g‘oyalarini yanada takomillashtirish va ularni muvaffaqiyatli startap loyihalarga aylantirish yuzasidan tavsiyalar berildi. Tadbir yakunida istiqbolli deb topilgan startap loyihalar UWED Startup Inkubatsiya Program 2026 dasturida ishtirok etish uchun saralab olindi.Mazkur inkubatsiya dasturi doirasida talabalar o‘z biznes g‘oyalarini rivojlantirish, mentorlar bilan ishlash, biznes modellarini shakllantirish hamda loyihalarini investorlar oldida taqdim etishga tayyorlash imkoniyatiga ega bo‘ladilar. Ushbu uchrashuv universitetda innovatsion va tadbirkorlik muhitini rivojlantirish, talabalarning tashabbuslarini qo‘llab-quvvatlash hamda istiqbolli g‘oyalarni amaliy loyihalarga aylantirishga qaratilgan tizimli ishlarning navbatdagi bosqichi bo‘ldi.

    JIDU rektori MDH Parlamentlararo Assambleyasining madaniyat, axborot, turizm va sport masalalariga bag‘ishlangan majlisida ishtirok etdi

    JIDU rektori MDH Parlamentlararo Assambleyasining madaniyat, axborot, turizm va sport masalalariga bag‘ishlangan majlisida ishtirok etdi

    Joriy yilning 22-oktabr kuni Toshkent shahrida Mustaqil Davlatlar Hamdo‘stligi Parlamentlararo Assambleyasi Madaniyat, axborot, turizm va sport bo‘yicha doimiy komissiyasining sayyor majlisi bo‘lib o‘tdi. Majlisda Ozarbayjon Respublikasi, Armaniston Respublikasi, Belarus Respublikasi, Qozog‘iston Respublikasi, Qirg‘iziston Respublikasi, Rossiya Federatsiyasi, Tojikiston Respublikasi va O‘zbekiston Respublikasi parlamentlari a’zolari ishtirok etdi. Oliy Majlis Senati Raisining birinchi o‘rinbosari, Jahon iqtisodiyoti va diplomatiya universiteti rektori Sodiq Safoyev majlisni ochar ekan, mazkur tadbir O‘zbekiston uchun MDH mamlakatlari o‘rtasidagi parlamentlararo muloqotni mustahkamlash, gumanitar aloqalarni kengaytirish va amaliy hamkorlikni rivojlantirishda muhim ahamiyat kasb etishini ta’kidlab o‘tdi. Tadbir davomida kun tartibiga kiritilgan keng ko‘lamli masalalar ko‘rib chiqildi. Jumladan, arxiv ishi, shaxsga doir ma’lumotlarni himoya qilish, adaptiv jismoniy tarbiya, talabalar va professional sport, ijodiy uyushmalar faoliyati sohalarida namunaviy qonun hujjatlarini ishlab chiqish va takomillashtirishga alohida e’tibor qaratildi. Bundan tashqari, tarixiy xotirani saqlash va turizm sohasida favqulodda vaziyatlar yuzaga kelganda MDHga a’zo davlatlarning o‘zaro hamkorligi sohasidagi milliy qonunchilikni takomillashtirish bo‘yicha tavsiyalar tayyorlash masalasi muhokama qilindi. So‘zga chiqqanlar madaniyat, axborot, turizm va sport sohalari MDH xalqlarini yaqinlashtirish, umumiy tarixiy-madaniy merosni asrab-avaylash, o‘zaro anglashuvni mustahkamlash hamda yosh avlodni do‘stlik va hurmat ruhida tarbiyalashda alohida o‘rin tutishini ta’kidladi. Ushbu yo‘nalishlarda parlamentlar o‘rtasidagi hamkorlikni yanada kengaytirish, yoshlar, ta’lim va madaniy almashinuvlarni rivojlantirish, barqaror turizmni qo‘llab-quvvatlash hamda ommaviy sportni ommalashtirish muhimligi qayd etildi. Shuningdek, majlisda Doimiy komissiyaning vakolatiga doir boshqa masalalar ham muhokama qilindi.