2026-yil 28-sentabr kuni Jahon iqtisodiyoti va diplomatiya universitetida Belgiya Qirolligining O‘zbekiston Respublikasidagi Favqulodda va Muxtor Elchisi Matias Kende bilan uchrashuv bo‘lib o‘tdi. Uchrashuv davomida Elchiga JIDU faoliyati, xalqaro akademik hamkorlik, Istiqbolli xalqaro tadqiqotlar instituti va Diplomatik akademiya ishlari haqida ma’lumot berildi. Tomonlar Belgiya va Yevropa universitetlari hamda tadqiqot markazlari, jumladan, Gent universiteti, Egmont instituti, CEPS, Lyoven katolik universiteti, Antverpen universiteti va Mons universiteti bilan hamkorlikni kengaytirish istiqbollarini muhokama qildilar. Takliflar qatoridan akademik almashinuvlar, qo‘shma tadqiqotlar, mehmon ma’ruzalari va ekspert tadbirlarini o‘tkazish o‘rin oldi. Ikki mamlakat diplomatik akademiyalari o‘rtasidagi hamkorlikka, shuningdek, Matias Kendening JIDUda JST, Yevropa tadqiqotlari va xalqaro munosabatlar masalalari bo‘yicha ma’ruzalar o‘qish imkoniyatiga alohida e’tibor qaratildi. Shuningdek, tomonlar JIDUda niderland tili kurslarini yo‘lga qo‘yishga qiziqish bildirdilar. Uchrashuv yakunlariga ko‘ra akademik almashinuvlar, qo‘shma ilmiy-tadqiqot loyihalari hamda diplomatlarni tayyorlash va malakasini oshirish dasturlarini o‘z ichiga olgan qo‘shma tadbirlar rejasini ishlab chiqish bo‘yicha kelishuvga erishildi.
2026-yil 29-sentabr kuni Jahon iqtisodiyoti va diplomatiya universitetida Xalqaro Qizil Xoch Qo‘mitasining (XQXQ) Markaziy Osiyodagi mintaqaviy delegatsiyasi bilan hamkorlikda “Xalqaro gumanitar huquqni o‘qitish va implementatsiya qilishning dolzarb masalalari” mavzusida davra suhbati o‘tkazildi. XQXQ hamda O‘zbekiston Respublikasi Inson huquqlari bo‘yicha milliy markazi o‘rtasidagi qo‘shma Harakatlar rejasi doirasida tashkil etilgan tadbir Inson huquqlari bo‘yicha beshinchi Samarqand forumiga bag‘ishlandi. Unda universitet professor-o‘qituvchilari, tadqiqotchilar va talabalar ishtirok etdilar. Davra suhbatini JIDUning “Xalqaro huquq va ommaviy-huquqiy fanlar” kafedrasi dotsenti Shirin Xamdamova olib bordi. U xalqaro gumanitar huquq normalarining amaliyotda samarali qo‘llanilishi ko‘p jihatdan bo‘lajak huquqshunos va diplomatlarning bilim hamda kasbiy tayyorgarligiga bog‘liqligini ta’kidladi. XQXQning Markaziy Osiyodagi mintaqaviy delegatsiyasi huquqiy masalalar bo‘yicha maslahatchisi Marat Aminov tashkilotning mandati, mintaqadagi faoliyati va O‘zbekiston oliy ta’lim muassasalari bilan hamkorligi haqida ma’lumot berdi. XQXQning Jenevadagi bosh qarorgohi huquqiy masalalar bo‘yicha maslahatchisi Vanessa Merfi zamonaviy qurolli mojarolar sharoitida xalqaro gumanitar huquq oldida turgan dolzarb masalalarga bag‘ishlangan ma’ruza bilan ishtirok etdi. Unda xalqaro gumanitar huquq normalarining yangi harbiy texnologiyalarga tatbiq etilishi, kiberoperatsiyalar, avtonom qurol tizimlari va sun’iy intellektdan harbiy maqsadlarda foydalanish bilan bog‘liq masalalar yoritildi. Shuningdek, yangi qurol turlari va urush olib borish usullarini huquqiy tekshiruvdan o‘tkazish, jabrlangan aholiga gumanitar yordam yetkazish hamda gumanitar xodimlar xavfsizligini ta’minlashning ahamiyati ta’kidlandi. Tadbir davomida ishtirokchilarga xalqaro gumanitar huquqni o‘qitish va uning normalarini milliy qonunchilikka implementatsiya qilishga ko‘maklashuvchi XQXQ resurslari taqdim etildi. Xususan, tashkilotning xalqaro gumanitar huquq bo‘yicha Maslahat xizmati, tegishli ma’lumotlar bazalari, o‘quv qo‘llanmalari, onlayn kurslari hamda talabalar uchun tanlovlari haqida so‘z yuritildi. Muhokamalarda xalqaro gumanitar huquqning o‘quv dasturlaridagi o‘rni va amaliyotga yo‘naltirilgan o‘qitish usullariga alohida e’tibor qaratildi.
2026-yil 28-sentabr kuni Jahon iqtisodiyoti va diplomatiya universitetida talaba-yoshlar o‘rtasida ma’naviy-ma’rifiy va profilaktik yo‘nalishdagi tadbir tashkil etildi. Tadbir “Tinchlik – eng oliy ne’mat” mavzusuiga bag‘ishlanib, unda mamlakatimizda tinchlik va osoyishtalikni ta’minlash, jamiyatda barqarorlikni mustahkamlash, yoshlar o‘rtasida sog‘lom ma’naviy muhitni shakllantirish, diniy bag‘rikenglik va millatlararo totuvlikni targ‘ib qilish, shuningdek, turli yot g‘oyalar va mafkuraviy tahdidlarning oldini olish masalalariga alohida e’tibor qaratildi. Tadbirda Din ishlari qo‘mitasining Toshkent shahar hududiy boshqarmasi Mirzo Ulug‘bek tumani bo‘yicha bosh mutaxassisi Qayumov Abdug‘affor Asatullayevich asosiy ma’ruzachi sifatida ishtirok etdi. Mutaxassis tomonidan ishtirokchilarga tinchlik va osoyishtalikning inson va jamiyat hayotidagi o‘rni, diniy bag‘rikenglikning ahamiyati, yoshlarni turli zararli va yot g‘oyalar ta’siridan asrash, axborot makonidagi turli buzg‘unchi mazmundagi materiallarga nisbatan tanqidiy va ongli munosabatni shakllantirish yuzasidan tushuntirishlar berildi. Uchrashuv davomida talaba-yoshlarning mavzu yuzasidan qiziqtirgan savollariga mutaxassis tomonidan batafsil javoblar berilib, mavjud muammolarni oldini olish va yoshlar bilan profilaktik-tushuntirish ishlarini tizimli ravishda olib borish bo‘yicha tegishli tavsiyalar berildi. Mazkur tadbir talaba-yoshlarning huquqiy va ma’naviy bilimlarini oshirish, ularda tinchlik va osoyishtalikni qadrlash, jamiyat hayotidagi ijtimoiy jarayonlarga daxldorlik hissini kuchaytirish, turli mafkuraviy tahdidlarga nisbatan mafkuraviy immunitetni shakllantirish hamda sog‘lom dunyoqarashni rivojlantirishga qaratilgan profilaktik ishlarning muhim yo‘nalishlaridan biri bo‘ldi. Tadbir yakunlari bo‘yicha universitetda talaba-yoshlar o‘rtasida mazkur yo‘nalishdagi ma’naviy-ma’rifiy va profilaktik tadbirlarni muntazam davom ettirish, tinchlik va bag‘rikenglik g‘oyalarini keng targ‘ib qilish hamda yoshlarning turli yot g‘oyalar ta’siriga tushib qolishining oldini olishga qaratilgan tushuntirish ishlarini kuchaytirish belgilandi.
Joriy yilning 14, 21 va 28-sentabr kunlari Jahon iqtisodiyoti va diplomatiya universiteti talabalari Adiblar xiyoboniga tashrif buyurdilar. Tashriflar belgilangan reja-jadvalga muvofiq, atoqli adiblar haykallari poyida ma’naviy-ma’rifiy tadbirlar hamda sport musobaqalarini o‘tkazish doirasida tashkil etildi. Tashriflar davomida talabalar o‘zbek adabiyoti namoyandalarining hayoti va ijodiga bag‘ishlangan adabiy dasturlarni namoyish etdilar. Xususan, Abdulla Qahhor haykali poyida yozuvchining boy ijodiy merosiga bag‘ishlangan ijodiy kecha o‘tkazildi. Unda adibning “O‘g‘ri” va “Bemor” hikoyalaridan parchalar o‘qildi, mazkur asarlar asosida tayyorlangan sahna ko‘rinishlari namoyish etildi. Shuningdek, tadbirlar doirasida talabalar she’rlar o‘qib, turli sport musobaqalarida ishtirok etdilar. Mazkur tadbirlar talabalarning adabiyotga bo‘lgan qiziqishini oshirish, milliy adabiy merosimizga hurmat tuyg‘usini mustahkamlash hamda yoshlar o‘rtasida sog‘lom turmush tarzini targ‘ib etishga xizmat qildi.
O‘zbekiston Respublikasi Prezidenti Shavkat Mirziyoyevning davlat mustaqilligining 35 yilligi munosabati bilan so‘zlagan nutqida ta’kidlangan “Milliy dastur”ning mazmun-mohiyatini talabalarga yetkazish, uning ahamiyatini keng targ‘ib qilish, shuningdek, yoshlarning ijtimoiy-siyosiy va ma’naviy dunyoqarashini yuksaltirish maqsadida 25-sentabr kuni Jahon iqtisodiyoti va diplomatiya universitetida “Yumshoq kuch diplomatiyasi” mavzusida mahorat darsi tashkil etildi. Tadbir Jahon iqtisodiyoti va diplomatiya universiteti dotsenti Shaxnoza Amirova tomonidan tashkil etilib, mazkur yo‘nalishdagi mahorat darslarining debyut o‘quv kursi sifatida muvaffaqiyatli o‘tkazildi. O‘quv kursi davomida ishtirokchilarga “yumshoq kuch diplomatiyasi” tushunchasi, uning zamonaviy xalqaro munosabatlardagi o‘rni va ahamiyati, shuningdek, diplomatik faoliyatda undan samarali foydalanishning zamonaviy yondashuvlari haqida ma’lumotlar berildi. Nazariy bilimlar amaliy mashg‘ulotlar, ochiq muhokamalar va savol-javoblar bilan uyg‘unlashtirilib, talabalarning faol ishtiroki ta’minlandi. Bu esa ishtirokchilarga olgan bilimlarini amaliy jihatdan mustahkamlash, yangi yondashuvlar bilan tanishish hamda o‘zaro tajriba almashish imkonini berdi. Mazkur mahorat darsining tashkil etilishi nafaqat yangi bilimlarni o‘zlashtirish, balki talabalar o‘rtasida tajriba almashish, kasbiy muloqot ko‘nikmalarini rivojlantirish va zamonaviy ta’lim yondashuvlarini ommalashtirish nuqtayi nazaridan ham muhim ahamiyat kasb etdi. Sh.Amirovaning mahorat darslari doirasida yo‘lga qo‘yilgan ushbu tashabbus kelgusida o‘quv-amaliy mashg‘ulotlarni yanada takomillashtirish, talabalarning kasbiy kompetensiyalarini rivojlantirish va ilg‘or tajribalarni keng ommalashtirishga xizmat qiladi. Debyut o‘quv kursining muvaffaqiyatli o‘tkazilgani mazkur yo‘nalishdagi ishlarni izchil davom ettirish uchun muhim zamin yaratdi. Kelgusida mahorat darslarini oyiga ikki marotaba tashkil etish rejalashtirilgan. Universitet talabalari uchun bunday mahorat darslari professional rivojlanish, tajriba almashish va ta’lim jarayoniga yangi g‘oyalarni olib kirishning samarali vositalaridan biri bo‘lib xizmat qiladi.
2026-yil 26-sentyabr kuni Jahon iqtisodiyoti va diplomatiya universitetida JIDU va “O‘zbekneftgaz” AJ rahbariyatining ishchi uchrashuvi bo‘lib o‘tdi. Uchrashuvda Oliy Majlis Senati Raisining birinchi o‘rinbosari, JIDU rektori Sodiq Safoyev va “O‘zbekneftgaz” AJ Boshqaruv raisi Abdug‘ani Sanginov ishtirok etdilar. Tomonlar kadrlar tayyorlash va qayta tayyorlash, ekspert-tahliliy faoliyat va kasbiy aloqalarni rivojlantirish sohasidagi hamkorlikning istiqbolli yo‘nalishlarini muhokama qildilar. Kompaniya ehtiyojlarini hisobga olgan holda menejment, marketing va sun’iy intellekt texnologiyalari bo‘yicha ta’lim dasturlarini ishlab chiqishga alohida e’tibor qaratildi. Shuningdek, ekspert-tahliliy hamkorlikni rivojlantirish, mintaqaviy energetika sohasida qo‘shma tadqiqot loyihalarini amalga oshirish, xorijiy hamkorlar va energetika majmuasi korxonalari, shu jumladan gidroenergetika sohasi bilan hamkorlik qilish masalalari ham ko‘rib chiqildi. Uchrashuv yakunlari bo‘yicha tomonlar hamkorlikni yanada rivojlantirish va qo‘shma tashabbuslarni amalga oshirishdan manfaatdor ekanliklarini tasdiqladilar.
Jahon iqtisodiyoti va diplomatiya universiteti Yuridik klinikasi talabalari va klinitsistlari milliy matbuotimiz hamda huquqshunoslik sohasi rivojiga munosib hissa qo‘shgan, mustabid tuzum davrida qatag‘on qilingan fidoyi ziyolilar — Sanjar Siddiq va Dilorom (Dinara) Yusupova xotirasiga bag‘ishlangan ma’rifiy davra suhbatida ishtirok etdilar. Tashrif va muloqot tashabbusi JIDU Yuridik klinikasi direktori Z.S. Ubaydullayev tomonidan ilgari surildi. Davra suhbatida so‘zga chiqqanlar adabiyot va matbuot fidoyisi Sanjar Siddiq, shuningdek, O‘zbekistonning ilk ayol huquqshunoslaridan biri Dilorom Yusupovaning hayoti va faoliyati, ularning millat ma’rifati va huquqshunoslik sohasi rivojiga qo‘shgan hissasi haqida ma’lumot berdilar. Tadbir davomida talabalar qatag‘on yillarida ta’qibga uchragan millat ziyolilarining hayot yo‘li va jasorati bilan yaqindan tanishib, milliy xotira, tarixiy adolat va ajdodlar merosini asrab-avaylashning shaxsiy hamda kasbiy kamolotdagi ahamiyati haqida yanada chuqurroq tasavvurga ega bo‘ldilar. Mazkur tashabbus JIDU Yuridik klinikasi nafaqat bo‘lajak huquqshunoslarning kasbiy bilim va ko‘nikmalarini rivojlantirish, balki milliy tarix, qadriyat va xotirani asrashga qaratilgan ma’rifiy tadbirlarni tashkil etishda ham muhim maskan ekanini yana bir bor namoyon etdi.
2026-yil 26-sentabr kuni Jahon iqtisodiyoti va diplomatiya universitetining Kino zalida (B blok) Birlashgan Millatlar Tashkiloti Modeli – UWED MUNning taqdimot marosimi bo‘lib o‘tdi. Ingliz tilida o‘tkazilgan tadbirda universitet talabalari hamda xalqaro munosabatlar va diplomatiyaga qiziqqan yoshlar ishtirok etdi. Ma’lumot uchun: UWED MUN 2005-yildan buyon o‘z faoliyatini olib bormoqda. Joriy yilning dekabr oyida bo‘lib o‘tadigan navbatdagi konferensiyada 280 nafar delegatning sakkizta qo‘mita – BMT Xavfsizlik Kengashi, Bosh Assambleya, YuNESKO, Inson huquqlari bo‘yicha kengash, Jahon savdo tashkiloti, Xalqaro sud, BMTning Atrof-muhit dasturi (YuNEP) hamda Iqtisodiy va ijtimoiy kengash (EKOSOS) ishida qatnashishi rejalashtirilgan. Tadbirni UWED MUN Bosh kotibi Jamshid Xakimov olib bordi. Taqdimot davomida ishtirokchilarga BMT modeli nima ekanligi, konferensiyaning shakli va qo‘mitalari, shuningdek, delegat bo‘lish qanday mas’uliyat va imkoniyatlarni anglatishi haqida batafsil so‘zlab berildi. UWED MUN haqidagi qisqa videorolik namoyishidan so‘ng tadbirning asosiy qismi – ko‘ngilochar MUN Quiz viktorinasi boshlandi. Ikki soat davom etgan bellashuvda ishtirokchilar jamoalarga bo‘linib, o‘z zukkoliklari va dunyoqarashlarini sinab ko‘rdilar. Tadbir yakunida viktorinada g‘olib chiqqan jamoa sertifikatlar va sovg‘alar bilan taqdirlandi. Tashkilotchilar yakuniy so‘z bilan chiqib, ishtirokchilarni dekabr oyida bo‘lib o‘tadigan UWED MUN konferensiyasida delegat sifatida qatnashishga taklif qildilar. Tadbir umumiy surat bilan yakunlandi.
