Test Title

Test Title

    JIDUda “Central Asia Summer School 2026” xalqaro yozgi maktabi muvaffaqiyatli o‘tkazildi

    JIDUda “Central Asia Summer School 2026” xalqaro yozgi maktabi muvaffaqiyatli o‘tkazildi

    2026-yil 29-iyun – 5-iyul kunlari Jahon iqtisodiyoti va diplomatiya universiteti (JIDU) tomonidan “Central Asia Summer School 2026” xalqaro yozgi maktabi muvaffaqiyatli tashkil etildi. Dastur dunyoning turli mamlakatlaridan iqtidorli talabalar va yosh tadqiqotchilarni bir platformada jamlab, ularga Markaziy Osiyoning zamonaviy siyosiy, iqtisodiy va geostrategik taraqqiyotiga bag‘ishlangan intensiv akademik va madaniy dasturda ishtirok etish imkonini yaratdi. Avval muvaffaqiyatli o‘tkazilgan “Central Asia Winter School” tajribasiga tayangan holda tashkil etilgan ushbu mavsumiy dastur JIDUning Markaziy Osiyo bo‘yicha xalqaro ilmiy muloqot va akademik hamkorlik markazi sifatidagi mavqeyini yana bir bor namoyon etdi. Yozgi maktabda ishtirok etish uchun 60 dan ortiq ariza kelib tushdi. Tanlov yakunlariga ko‘ra 22 nafar ishtirokchi saralab olindi. Ularning 21 nafari xorijiy davlatlar vakillari bo‘lib, Buyuk Britaniya, AQSh, Kanada, Fransiya, Germaniya, Italiya, Shveysariya, Polsha, Ruminiya, Vengriya, Hindiston, Xitoy, Koreya Respublikasi va O‘zbekistondan tashrif buyurdilar. Ishtirokchilar “SOAS University of London, University College London (UCL), University of Pennsylvania, University of St Andrews, Ludwig Maximilian University of Munich (LMU Munich), Sciences Po Grenoble, University of Warsaw, LUISS University, Hankuk University of Foreign Studies (HUFS), Sun Yat-sen University, INALCO, Andrássy University Budapest, University of Regensburg, Jawaharlal Nehru University” hamda SMK kabi nufuzli oliy ta’lim muassasalarining bakalavr, magistr va doktorantlari bo‘lib, xalqaro munosabatlar, siyosatshunoslik, iqtisodiyot, huquq, tarix va mintaqashunoslik yo‘nalishlarida tahsil olmoqda. Dastur doirasida JIDU professor-o‘qituvchilari, diplomatlar va yetakchi ekspertlar ishtirokida fanlararo akademik ma’ruzalar tashkil etildi. Mashg‘ulotlar Markaziy Osiyoning tarixiy taraqqiyoti va mintaqaviy o‘ziga xosligi, Yangi O‘zbekiston tashqi siyosatining ustuvor yo‘nalishlari, geosiyosiy jarayonlar, mintaqaviy hamkorlik, davlat boshqaruvi va islohotlar, transchegaraviy suv resurslarini boshqarish, iqtisodiy transformatsiya, Afg‘oniston bilan bog‘liq xavfsizlik masalalari, energetik diplomatiya, yashil energetika hamda transport yo‘laklari va mintaqaviy bog‘liqlik kabi dolzarb mavzularni qamrab oldi. Ma’ruzalar JIDUning akademik masalalar bo‘yicha birinchi prorektori va Ilg‘or xalqaro tadqiqotlar instituti (IAIS) direktori doktor Akram Umarov, Markaziy Osiyo xalqaro instituti (IICA) direktori doktor Javlon Vahobov, professor Mirzoxid Rahimov, professor Ulug‘bek Ishonxo‘jayev, doktor Iskandar Abdullayev, Mirshohid Aslanov, doktor Elbek Abdullayev, professor Rovshan Alimov, doktor Hayotjon Ibragimov hamda professor Islomxon G‘afforov tomonidan olib borildi. Ularning chiqishlari nazariy bilimlarni amaliy tajriba bilan uyg‘unlashtirgan holda ishtirokchilarga mintaqadagi zamonaviy jarayonlar yuzasidan chuqur tahliliy qarashlarni taqdim etdi. Akademik mashg‘ulotlar bilan bir qatorda ishtirokchilar uchun boy madaniy va kasbiy dastur ham tashkil etildi. Ular Markaziy Osiyo xalqaro instituti (IICA) va Progressiv islohotlar markaziga (CPR) tashrif buyurib, ekspertlar bilan uchrashuvlarda ishtirok etdilar. Shuningdek, Temuriylar tarixi davlat muzeyi, Islom sivilizatsiyasi markazi, “Shahidlar xotirasi” yodgorlik majmuasi hamda Toshkent shahrining tarixiy va madaniy maskanlariga sayohat uyushtirildi. Yozgi maktab yakunida barcha ishtirokchilarga dastur muvaffaqiyatli tamomlanganini tasdiqlovchi sertifikatlar hamda 2 ECTS kreditini tasdiqlovchi maxsus sertifikatlar topshirildi. Dastur xalqaro akademik hamkorlikni rivojlantirish, Markaziy Osiyo bo‘yicha ilmiy bilimlarni chuqurlashtirish hamda turli mamlakatlardan kelgan talabalar va yosh tadqiqotchilar o‘rtasida professional aloqalarni mustahkamlashga xizmat qildi. Ishtirokchilar O‘zbekistonda amalga oshirilayotgan islohotlar, mintaqaning strategik ahamiyati va xalqaro hamkorlik istiqbollari bilan yaqindan tanishish imkoniyatiga ega bo‘ldilar.

    JIDU talabalari Malayziyada bo‘lib o‘tgan Xalqaro madaniyat festivalida O‘zbekiston vakili sifatida ishtirok etdi

    JIDU talabalari Malayziyada bo‘lib o‘tgan Xalqaro madaniyat festivalida O‘zbekiston vakili sifatida ishtirok etdi

    2026-yilning 27-iyulidan 2-avgustiga qadar Malayziyaning Sabax shtatidagi Tavau shahrida XI Tavau xalqaro madaniyat festivali (Tawau International Cultural Festival 2026) bo‘lib o‘tdi. Tadbir “Colour of Culture” (“Madaniyat jilosi”) shiori ostida o‘tkazilib, dunyoning turli mamlakatlari vakillarini bir yerga jamladi. Festivalda Jahon iqtisodiyoti va diplomatiya universiteti talabalari O‘zbekiston Respublikasi nomidan qatnashgan milliy delegatsiya tarkibida ishtirok etdi. Ular xalqaro jamoatchilikni mamlakatimizning boy madaniy merosi, milliy urf-odatlari, musiqa va raqs san’ati bilan tanishtirdilar. O‘zbekiston delegatsiyasining chiqishi madaniy dasturning yorqin sahifasi bo‘lib, festival tashkilotchilari, mehmonlari va ishtirokchilarida katta qiziqish uyg‘otdi. Ochiqlik, mehmondo‘stlik va boshqa mamlakatlar vakillari bilan faol muloqotlari tufayli O‘zbekiston delegatsiyasi “Eng do‘stona mamlakat” faxriy nominatsiyasiga loyiq ko‘rildi. Mazkur xalqaro festivalning asosiy maqsadlari davlatlar o‘rtasidagi do‘stona aloqalarni mustahkamlash, milliy madaniyatlarni ommalashtirish hamda turli xalqlar vakillari o‘rtasida tinchlik va totuvlikka ko‘maklashishdan iborat bo‘ldi. JIDU talabalarining tadbirdagi ishtiroki O‘zbekistonning xalqaro maydondagi madaniy obro‘sini yuksaltirishga, madaniyatlararo muloqotni kengaytirishga va boshqa davlatlar yoshlari bilan do‘stona aloqalarni mustahkamlashga hissa qo‘shdi. Qo‘lga kiritilgan natija nafaqat ishtirokchilarning iste’dodi va puxta tayyorgarligi, balki o‘zbek xalqiga xos bo‘lgan mehmondo‘stlik, samimiylik va turli madaniyat vakillariga hurmat kabi an’anaviy qadriyatlarning e’tirofi bo‘ldi.

    JIDU talabasi Erasmus+ xalqaro yozgi maktabini muvaffaqiyatli tamomladi

    JIDU talabasi Erasmus+ xalqaro yozgi maktabini muvaffaqiyatli tamomladi

    Jahon iqtisodiyoti va diplomatiya universiteti (JIDU) Xalqaro huquq fakulteti talabasi Davronov Muhammadaziz Litvaning SMK Amaliy fanlar universiteti (SMK University of Applied Sciences) tomonidan Erasmus+ dasturi doirasida tashkil etilgan “Lithuanian Culture Course” xalqaro yozgi maktabini muvaffaqiyatli tamomladi. Bir oy davom etgan ta’lim dasturi turli mamlakatlardan kelgan talabalarni bir maydonga jamlab, ularga Litvaning tarixi, madaniyati, tili va milliy an’analari bilan yaqindan tanishish imkonini berdi. Dastur doirasida ishtirokchilar Litva madaniyati va jamiyati bo‘yicha ma’ruza hamda interaktiv mashg‘ulotlarda qatnashdilar, madaniy-ma’rifiy tadbirlarda ishtirok etdilar, shuningdek, mamlakatning turli shaharlariga tashkil etilgan ta’limiy ekskursiyalar orqali Litvaning tarixiy va madaniy merosi bilan tanishdilar. Erasmus+ xalqaro yozgi maktabida ishtirok etish Muhammadaziz Davronovning akademik va shaxsiy rivojlanishida muhim bosqich bo‘ldi. Dastur unga xalqaro akademik muhitda ta’lim olish, madaniyatlararo muloqot ko‘nikmalarini rivojlantirish, xorijiy hamkorlar bilan professional aloqalarni kengaytirish hamda qimmatli xalqaro tajriba orttirish imkonini berdi.

    ACQUIN ekspertlari JIDU faoliyatini yuqori baholadi

    ACQUIN ekspertlari JIDU faoliyatini yuqori baholadi

    2026-yil 31-iyul kuni ACQUIN xalqaro ekspertlar guruhining Jahon iqtisodiyoti va diplomatiya universitetiga tashrifining uchinchi kuni yakunlandi. Kun davomida ekspertlar universitet rahbariyati, ta’lim sifatini ta’minlash bo‘linmalari, ma’muriy va servis xizmatlari vakillari, shuningdek, professor-o‘qituvchilar va ta’lim dasturlari koordinatorlari bilan uchrashuvlar o‘tkazdi. Uchrashuvlarda ta’lim sifatini ichki nazorat qilish, ta’lim dasturlarini boshqarish, raqamli transformatsiya, talabalarni qo‘llab-quvvatlash, xalqaro hamkorlik, kadrlar siyosati hamda universitet infratuzilmasini rivojlantirish masalalari muhokama qilindi. Tashrif yakunida ekspertlar guruhi o‘zining dastlabki xulosalarini taqdim etgan yakuniy uchrashuv bo‘lib o‘tdi. Ekspertlar JIDUning tizimli ish yuritishini, universitet jamoasining mahoratini, muloqot va doimiy takomillashuv uchun ochiqligini, shuningdek, ta’lim, ilmiy tadqiqotlar va institutsional rivojlanish sohalarida erishilgan yutuqlarni ijobiy baholadi. Madaniy dastur doirasida 1-avgust kuni ekspertlar guruhi a’zolari uchun Samarqand shahriga sayohat uyushtirildi. Mehmonlar shaharning boy tarixiy-madaniy merosi bilan tanishib, uning asosiy diqqatga sazovor joylarini ziyorat qildi. Ekspertlar sayohatdan olgan ijobiy taassurotlari bilan bo‘lishar ekan, dasturning yuksak saviyada tashkil etilganini, mehmondo‘stlikni va Samarqandning o‘ziga xos muhitini alohida ta’kidladi. Universitet xalqaro akkreditatsiya tashrifining muvaffaqiyatli o‘tishiga qo‘shgan hissasi va faol ishtiroki uchun ACQUIN ekspertlariga, universitet rahbariyati, professor-o‘qituvchilari, xodimlari, talabalari va bitiruvchilariga o‘z minnatdorchiligini bildiradi.

    JIDU talabalari ishtirokida “Yashil tafakkur – barqaror kelajak” ekologik-psixologik aksiyasi o‘tkazildi

    JIDU talabalari ishtirokida “Yashil tafakkur – barqaror kelajak” ekologik-psixologik aksiyasi o‘tkazildi

    Jahon iqtisodiyoti va diplomatiya universiteti hamda Xalqaro yoshlar ekologik qo‘mitasi hamkorligida Toshkent shahridagi Ekobog‘ hududida “Yashil tafakkur – barqaror kelajak” mavzusida ekologik-psixologik aksiya tashkil etildi. Mazkur aksiya talaba-yoshlar, maktab va litsey o‘quvchilari hamda keng jamoatchilik o‘rtasida ekologik madaniyatni yuksaltirish, ekologik ong va fuqarolik mas’uliyatini mustahkamlash, tabiatga nisbatan mas’uliyatli munosabatni shakllantirish hamda barqaror rivojlanish tamoyillarini keng targ‘ib etishga qaratildi. Tadbir ekologik ta’lim, psixologik yondashuv va yoshlar tashabbuslarini o‘zaro uyg‘unlashtirgan holda Birlashgan Millatlar Tashkilotining Barqaror rivojlanish maqsadlari, xususan, sifatli ta’lim, iqlim o‘zgarishiga qarshi kurashish, ekologik barqarorlikni ta’minlash va ekologik madaniyatni rivojlantirish yo‘nalishlariga hamohang tarzda o‘tkazildi. Aksiyada universitet talabalari, maktab va litsey o‘quvchilari, volontyorlar, ekologik tashabbuskor yoshlar hamda ekologiya masalalariga befarq bo‘lmagan fuqarolar faol ishtirok etdilar. Tadbir davomida ekologik etika, yashil tafakkurni rivojlantirish, ekologik xavfsizlikni ta’minlash, fuqarolik mas’uliyatini kuchaytirish va ekologik qadriyatlarni keng targ‘ib etish masalalari yuzasidan mazmunli muloqotlar olib borildi. Aksiyaning faxriy mehmoni, Xalqaro yoshlar ekologik qo‘mitasi raisi Lobarxon Jalolova ekologik diplomatiya, yoshlarning xalqaro ekologik tashabbuslardagi ishtiroki, ekologik volontyorlik harakatini rivojlantirish hamda ekologik yetakchilikning bugungi kundagi ahamiyati haqida ma’ruza qildi. U ekologik muammolarni bartaraf etishda har bir fuqaroning shaxsiy mas’uliyati, yoshlarning tashabbuskorligi va ekologik madaniyatni yuksaltirish barqaror kelajakni ta’minlashning muhim omillaridan biri ekanini alohida ta’kidladi. Universitet psixologi Nargiza Norova tomonidan ekologik ongni rivojlantirishning psixologik asoslari, inson va tabiat o‘rtasidagi uyg‘unlik, ekologik mas’uliyatni shakllantirish hamda ekologik xulq-atvorni rivojlantirishga bag‘ishlangan interaktiv trening o‘tkazildi. Trening davomida psixologik mashqlar, ijtimoiy-psixologik diagnostika, ekoterapiya elementlari va jamoaviy mashg‘ulotlar orqali ishtirokchilarda ekologik qadriyatlarni mustahkamlash, tabiat bilan uyg‘un yashash madaniyatini rivojlantirish hamda ekologik muammolarga ongli yondashuvni shakllantirishga alohida e’tibor qaratildi. Yoshlar ishlari ofisi mutaxassisi Feruza Ernazarova ekologik madaniyatni shakllantirish uzluksiz ta’lim tizimi va jamiyatning umumiy mas’uliyati ekanini qayd etdi. U yoshlarni tabiatni asrash, yashil hududlarni ko‘paytirish, tabiiy resurslardan oqilona foydalanish hamda ekologik qadriyatlarni kundalik hayotning ajralmas qismiga aylantirishga chaqirdi. Aksiyani tashkil etishda Jahon iqtisodiyoti va diplomatiya universiteti talabasi, Xalqaro yoshlar ekologik qo‘mitasi raisi o‘rinbosari Mirfayz Nutfullayev faol tashabbus ko‘rsatdi. Uning tashabbusi bilan yoshlarni ekologik volontyorlik harakatiga keng jalb etish, ekologik loyihalarni qo‘llab-quvvatlash, jamoatchilik tashabbuslarini rivojlantirish va ekologik madaniyatni ommalashtirishga qaratilgan amaliy tadbirlar tashkil etildi. Aksiya yakunida ekologik madaniyatni rivojlantirish, tabiiy resurslarni asrash, iqlim o‘zgarishi oqibatlarini yumshatish hamda Barqaror rivojlanish maqsadlariga erishishda davlat organlari, ta’lim muassasalari, fuqarolik jamiyati institutlari va yoshlarning o‘zaro hamkorligi muhim ahamiyat kasb etishi ta’kidlandi. Mazkur ekologik-psixologik aksiya ekologik ta’lim, ekologik etika va psixologik yondashuvlarni yagona platformada uyg‘unlashtirib, ishtirokchilarning ekologik dunyoqarashini kengaytirish, fuqarolik mas’uliyatini mustahkamlash, yoshlarning ekologik tashabbuslarini qo‘llab-quvvatlash hamda jamiyatda ekologik madaniyatni yuksaltirishga xizmat qilgan muhim ma’rifiy tashabbus bo‘ldi.

    JIDUda ACQUIN xalqaro ekspertlar guruhi tashrifining ikkinchi kuni davom etmoqda

    JIDUda ACQUIN xalqaro ekspertlar guruhi tashrifining ikkinchi kuni davom etmoqda

    2026-yil 30-iyul kuni Jahon iqtisodiyoti va diplomatiya universitetida Germaniyaning ACQUIN akkreditatsiya agentligi xalqaro ekspertlar guruhi tashrifining ikkinchi kuni davom etdi. Kunning ish dasturi ekspertlar guruhining ichki yig‘ilishi bilan boshlandi. Shundan so‘ng JIDU rahbariyati va universitet tarkibiy bo‘linmalari rahbarlari bilan uchrashuv bo‘lib o‘tdi. Uchrashuv davomida ekspertlar JIDU faoliyatining asosiy yo‘nalishlari, universitetni boshqarish va ta’lim sifatini ta’minlash tizimi, raqamli transformatsiya jarayonlari, shuningdek, universitetning 2027–2035-yillarga mo‘ljallangan rivojlanish strategiyasining asosiy qoidalari bilan tanishdi. Shuningdek JIDUning kompleks rivojlanishi hamda universitetda amalga oshirilayotgan islohotlarning asosiy natijalariga bag‘ishlangan maxsus videomaterial ham namoyish etildi. Unda boshqaruv tizimini takomillashtirish, ta’lim va ilmiy faoliyat sifatini oshirish, xalqaro hamkorlikni rivojlantirish, talabalarni qo‘llab-quvvatlash, raqamli transformatsiya jarayonlari hamda universitet infratuzilmasini modernizatsiya qilish bo‘yicha amalga oshirilayotgan ishlar yoritildi. Shuningdek, zamonaviy talablarga va xalqaro standartlarga mos, shaffof, texnologik hamda xalqaro yo‘naltirilgan ta’lim muhitini shakllantirishga alohida e’tibor qaratildi. Shundan so‘ng ekspertlar guruhi ta’lim dasturlari koordinatorlari hamda professor-o‘qituvchilar bilan uchrashdi. Tomonlar ta’lim dasturlarining mazmuni va tuzilishi, o‘quv jarayonini tashkil etish, kutilayotgan ta’lim natijalari, ilmiy-tadqiqot faoliyati hamda talabalar bilan o‘zaro hamkorlik mexanizmlarini muhokama qildi. Dastur yakunida JIDU talabalari va bitiruvchilari bilan uchrashuv o‘tkazildi. Ochiq muloqot davomida ta’lim sifati, akademik va kasbiy rivojlanish imkoniyatlari, talabalarning universitet hayotidagi ishtiroki, shuningdek, egallangan bilim va ko‘nikmalarning keyingi kasbiy faoliyatdagi ahamiyati va talabgirligi muhokama qilindi. O‘tkazilgan uchrashuvlar xalqaro ekspertlarga xalqaro dasturiy akkreditatsiya jarayoni doirasida JIDUning akademik, boshqaruv va institutsional faoliyati haqida har tomonlama tasavvur hosil qilish imkonini berdi.

    JIDU va MAKÜ hamkorligi doirasida Oʻzbekiston madaniyati Turkiyada keng targʻib qilindi

    JIDU va MAKÜ hamkorligi doirasida Oʻzbekiston madaniyati Turkiyada keng targʻib qilindi

    Jahon iqtisodiyoti va diplomatiya universiteti hamda Turkiya Respublikasining Burdur Mehmet Akif Ersoy universiteti (MAKÜ) oʻrtasidagi xalqaro hamkorlik doirasida amalga oshirilayotgan qoʻshma loyihalar yana bir muhim natija bilan boyidi. TÖMER Yozgi maktabi dasturi doirasida MAKÜda ta’lim olayotgan JIDU talabalari va Yevropa va turkiy tillar kafedrasi professor-oʻqituvchilari ishtirokida Oʻzbekistonning milliy madaniyati va an'analariga bagʻishlangan tadbir tashkil etildi. MAKÜning Kitap Kafe madaniy maydonida oʻtkazilgan tadbirda JIDU vakillari mehmonlarga oʻzbek milliy taomlari va shirinliklarini taqdim etdilar, shuningdek, milliy musiqa namunalari orqali Oʻzbekistonning boy madaniy merosi, urf-odatlari va qadriyatlarini namoyish etdilar. Tadbirda MAKÜ rektori oʻrinbosari professor doktor Ogʻuz Gyursoy, universitetning TÖMER hamda Xalqaro aloqalar koordinatorligi xodimlari, JIDU professor-oʻqituvchilari va talabalari ishtirok etdilar. Ushbu madaniy tadbir JIDU va MAKÜ oʻrtasida amal qilayotgan ikki tomonlama hamkorlik kelishuvi doirasida tashkil etilgan TÖMER Yozgi maktabi dasturining muhim qismi boʻlib, u talabalarning nafaqat turk tilini chuqur oʻrganishi, balki Turkiya tarixi, madaniyati va ijtimoiy hayoti bilan yaqindan tanishishiga xizmat qilmoqda. Yozgi maktab davomida ishtirokchilar Burdur shahri va Turkiyaning boshqa hududlariga ham tashrif buyurib, mamlakatning tarixiy va madaniy merosi bilan tanishmoqdalar. Bu esa ikki davlat xalqlari oʻrtasidagi doʻstlik va oʻzaro anglashuvni yanada mustahkamlashga xizmat qilmoqda. Mazkur tadbir JIDUning xalqarolashuv strategiyasi hamda xorijiy oliy ta’lim muassasalari bilan akademik hamkorlikni kengaytirishga qaratilgan sa’y-harakatlarining yana bir amaliy natijasi boʻlib, kelgusida talabalar va professor-oʻqituvchilar akademik almashinuvi, qoʻshma ta’lim dasturlari hamda ilmiy tadqiqotlarni yanada rivojlantirish uchun mustahkam asos yaratadi. E’tiborli jihati shundaki, mazkur madaniy tadbir Turkiya ommaviy axborot vositalarida ham keng yoritildi. Xususan, Burdur viloyatining bir qator nufuzli axborot portallari va yangilik saytlari ushbu tashabbusni yoritib, JIDU va MAKÜ oʻrtasidagi hamkorlik hamda Oʻzbekiston madaniyatining Turkiyada targʻib qilinishiga alohida e’tibor qaratdilar. Bu esa ikki universitet oʻrtasidagi hamkorlikning xalqaro maydondagi ijobiy imiji va nufuzini yanada oshirishga xizmat qilmoqda. Ta’kidlash joizki, mazkur hamkorlikni rivojlantirish boʻyicha tashabbus 2024 yilda JIDU Yevropa va turkiy tillar kafedrasi mudirining MAKÜga amalga oshirgan rasmiy tashrifi davomida ilgari surilgan edi. Muzokaralar natijasida ikki universitet oʻrtasida ta’lim, ilmiy tadqiqot va akademik mobillik sohalarida hamkorlikni kengaytirish boʻyicha kelishuvlarga erishildi. Bugungi kunda amalga oshirilayotgan qoʻshma loyihalar ushbu tashabbuslarning izchil davomi hisoblanadi.

    JIDUda ACQUIN xalqaro ekspertlar guruhining akkreditatsiya tashrifi boshlandi

    JIDUda ACQUIN xalqaro ekspertlar guruhining akkreditatsiya tashrifi boshlandi

    Jahon iqtisodiyoti va diplomatiya universitetiga Germaniyaning ACQUIN akkreditatsiya agentligi xalqaro ekspertlar delegatsiyasi tashrif buyurdi. Tashrif universitet ta’lim dasturlarini xalqaro dasturiy akkreditatsiyadan o‘tkazish jarayoni doirasida tashkil etildi. Ekspertlar uch kun davomida — 2026-yil 29–31-iyul kunlari JIDUning akademik faoliyati, ta’lim sifatini ta’minlash tizimi, o‘quv jarayonini tashkil etish, ta’lim infratuzilmasi hamda universitet boshqaruv mexanizmlarini kompleks o‘rganadi. Tashrif dasturidan universitet kampusi bilan tanishish, rahbariyat, ta’lim dasturlari koordinatorlari, professor-o‘qituvchilar, ma’muriy va xizmat ko‘rsatish bo‘linmalari xodimlari, shuningdek, talabalar hamda bitiruvchilar bilan uchrashuvlar o‘rin olgan.  Mustaqil ekspertlar guruhi tarkibiga Germaniya, Turkiya, Malta, Avstriya va O‘zbekiston universitetlari hamda tashkilotlari vakillari — professor Pinar Gedikkaya (Bal), professor Thomas Lauer, professor Nozimaxon Gafurova, ta’lim sifatini ta’minlash bo‘yicha xalqaro ekspert Martin Borg hamda talaba-ekspert Peter Schroeder kiritilgan. Ekspertlar guruhi faoliyati ACQUIN vakillari Janine Igl va doktor Jasmine Rudolph tomonidan muvofiqlashtirilmoqda. ACQUIN oliy ta’lim sohasida akkreditatsiya va sifatni ta’minlashga ixtisoslashgan mustaqil Germaniya notijorat agentligi hisoblanadi. Baholash jarayoni akademik ekspertlar, professional soha vakillari va talabalardan iborat mustaqil komissiya tomonidan agentlik mezonlari hamda Yevropa oliy ta’lim hududida sifatni ta’minlash standartlari asosida amalga oshiriladi. Tashrif davomida ta’lim dasturlarining mazmuni va tuzilishi, professor-o‘qituvchilarning malakasi, ta’lim natijalari, ichki sifatni ta’minlash tizimi, talabalar va bitiruvchilar bilan hamkorlik, raqamli boshqaruv, xalqaro hamkorlik hamda JIDUning 2027–2035-yillarga mo‘ljallangan rivojlanish strategiyasini amalga oshirish jarayoniga alohida e’tibor qaratiladi. Tashrif yakunida ekspertlar guruhi universitet rahbariyatiga o‘tkazilgan tahlilning dastlabki natijalari va asosiy xulosalarini taqdim etadigan yakuniy uchrashuv bo‘lib o‘tadi. Xalqaro akkreditatsiyaning o‘tkazilishi JIDUda ta’lim dasturlarini takomillashtirish, ichki sifatni ta’minlash tizimini mustahkamlash hamda universitetning xalqaro akademik makonga yanada faol integratsiyalashuvi yo‘lidagi muhim bosqich hisoblanadi.