2026-yil 2-noyabr kuni Jahon iqtisodiyoti va diplomatiya universitetida “UWED Startup inkubatsiya dasturi – 2026”ning tantanali ochilish marosimi bo‘lib o‘tdi. Mazkur tadbir universitetning Raqamli ta’lim, innovatsiyalar va akseleratsiya markazi tomonidan talabalarning innovatsion tashabbuslarini qo‘llab-quvvatlash, istiqbolli startap loyihalarini rivojlantirish, ularni amaliyotga tatbiq etish hamda yoshlar o‘rtasida tadbirkorlik madaniyatini shakllantirish maqsadida tashkil etildi. Tadbir davomida universitetning Raqamli transformatsiya va iqtisodiy masalalar bo‘yicha prorektori Zafar Davlatov inkubatsiya dasturi doirasida amalga oshirilgan ishlar, uning asosiy bosqichlari, istiqboldagi rejalar hamda ishtirokchilar va startap loyihalar soniga oid ma’lumotlarni taqdim etdi. Ta’kidlanganidek, joriy yilda dasturga 200 nafardan ortiq ishtirokchi va 100 dan ziyod startap loyiha jalb etilgan. Ushbu ko‘rsatkichlar talaba-yoshlarning innovatsion faoliyat va startap tadbirkorligiga bo‘lgan qiziqishi ortib borayotganini namoyon etadi. Ochilish marosimida O‘zbekiston Respublikasi Raqamli texnologiyalar vazirligi vakili Nodir Alibekov, IT Park Uzbekistan vakili Usmon Rahimjonov hamda Plug and Play kompaniyasining Markaziy Osiyo bo‘yicha direktor o‘rinbosari Ozodbek Odilbekov ishtirok etdilar. Mehmonlar o‘z chiqishlarida startap ekotizimini rivojlantirish, innovatsion g‘oyalarni amaliy loyihalarga aylantirish, yosh tadbirkorlarni qo‘llab-quvvatlash hamda mahalliy va xalqaro hamkorlikni kengaytirishning ahamiyatiga alohida to‘xtaldilar. Shuningdek, tadbir doirasida AQShda faoliyat yuritayotgan Silk Road Innovation Hub vakili Nilufar Majidovaning maxsus videomurojaati namoyish etildi. Ochilish marosimi yakunida O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev so‘zga chiqib, talaba-yoshlarga o‘z tilak va tavsiyalarini bildirdi. Rektor innovatsion fikrlash, tashabbuskorlik va zamonaviy bilimlarning yoshlar kasbiy kamolotidagi ahamiyatiga e’tibor qaratib, “UWED Startup inkubatsiya dasturi – 2026”ga rasman start berdi. Mazkur dastur universitetda innovatsion va tadbirkorlik muhitini yanada rivojlantirish, talabalarning istiqbolli g‘oyalarini amaliy loyihalarga aylantirish, ularning startap tashabbuslarini qo‘llab-quvvatlash hamda mahalliy va xalqaro hamkorlik imkoniyatlarini kengaytirishga xizmat qiladi.
2026-yil 2-noyabr kuni Jahon iqtisodiyoti va diplomatiya universitetida O‘zbekiston Respublikasi Oliy Majlisi Senati Raisining birinchi o‘rinbosari, JIDU rektori Sodiq Safoyev boshchiligida universitet rahbariyati va faol talabalar ishtirokida navbatdagi ochiq muloqot tashkil etildi. Uchrashuvning asosiy maqsadi universitet rahbariyati va talaba-yoshlar o‘rtasidagi bevosita muloqotni mustahkamlash, talabalarning taklif va tashabbuslarini qo‘llab-quvvatlash, ular uchun yaratilayotgan imkoniyatlarni kengaytirish hamda universitet hayotiga oid dolzarb masalalarni muhokama qilishdan iborat bo‘ldi. Tadbir davomida Yoshlar masalalari va ma’naviy-ma’rifiy ishlar bo‘yicha birinchi prorektor Oydin Mannopova avvalgi rektor va talabalar uchrashuvida ko‘tarilgan masalalar yuzasidan amalga oshirilgan ishlar, ko‘rilgan chora-tadbirlar hamda erishilgan natijalar haqida ma’lumot berdi. Ochiq muloqot davomida talabalar o‘zlarini qiziqtirgan savollar bilan universitet rahbariyatiga bevosita murojaat qilib, ta’lim jarayoni, talabalarga yaratilayotgan shart-sharoitlar, universitet hayotini yanada takomillashtirish hamda yoshlar tashabbuslarini qo‘llab-quvvatlash yuzasidan o‘z fikr va takliflarini bildirdilar. Shuningdek, uchrashuvda talabalarning universitet hayotidagi ishtirokini faollashtirish, ularning yetakchilik va ijodiy salohiyatini rivojlantirish, innovatsion g‘oyalar va istiqbolli loyihalarni qo‘llab-quvvatlash masalalariga alohida e’tibor qaratildi. Uchrashuv yakunida talabalar tomonidan bildirilgan taklif va tashabbuslarni tegishli tartibda ko‘rib chiqish, ko‘tarilgan masalalar yuzasidan izchil ish olib borish hamda universitet rahbariyati va talabalar o‘rtasidagi ochiq muloqotni muntazam davom ettirish muhimligi ta’kidlandi. Mazkur uchrashuv JIDUda talaba-yoshlarning fikr va tashabbuslariga alohida e’tibor qaratilayotgani, ularning universitet rivojidagi faol ishtirokini ta’minlash hamda rahbariyat bilan samarali muloqotni mustahkamlashga qaratilgan sa’y-harakatlarning davomidir.
JIDU Xalqaro huquq fakulteti “Xalqaro huquq va ommaviy huquq fanlari” kafedrasi professori v.b. Surayyo Usmanova AQShdagi Fulbrayt tadqiqotchisi sifatidagi ilmiy faoliyati doirasida Birlashgan Millatlar Tashkilotining institutsional faoliyati hamda Barqaror rivojlanish maqsadlariga bag‘ishlangan xalqaro tadbirlarda ishtirok etdi. Xususan, Nyu-York shahridagi BMT bosh qarorgohiga tashrif buyurib, Bosh Assambleya va Xavfsizlik Kengashi majlislarida kuzatuvchi sifatida qatnashdi. Mazkur tashrif O‘zbekiston Respublikasining BMT huzuridagi Doimiy vakolatxonasi ko‘magida amalga oshirildi. Tashrif davomida BMTning asosiy organlari faoliyati, xalqaro tinchlik va xavfsizlikni ta’minlashga qaratilgan ko‘p tomonlama diplomatik muzokaralar, xalqaro qarorlar qabul qilish tartibi hamda xalqaro huquq normalarining amaliy tatbiqi bilan bevosita tanishish imkoniyati yaratildi. Shuningdek, 2026-yil 25-oktabr kuni S. Usmanova AQShning Pensilvaniya shtatida BMT tashkil etilgan kun munosabati bilan o‘tkazilgan tadbirida Pensilvaniya universitetida akademik hamjamiyati vakili sifatida ishtirok etdi.AQSh BMT Assotsiatsiyasining Markaziy Pensilvaniya bo‘limi tomonidan tashkil etilgan mazkur tadbir “Ochlikka barham berish sari: Yoshlar oziq-ovqat laboratoriyasining innovatsion yechimlari” (“Towards Zero Hunger: Innovative Solutions from the Youth Food Lab”) mavzusiga bag‘ishlandi. Tadbir doirasida BMTning 2030-yilgacha bo‘lgan Barqaror rivojlanish kun tartibi, xususan, 2-maqsad “Ochlikka barham berish” (SDG 2: Zero Hunger) bilan bog‘liq dolzarb masalalar muhokama qilindi. Global oziq-ovqat xavfsizligini ta’minlash, barqaror oziq-ovqat tizimlarini rivojlantirish, yoshlarning innovatsion tashabbuslarini qo‘llab-quvvatlash hamda Barqaror rivojlanish maqsadlariga erishishda xalqaro hamkorlikni kuchaytirish masalalariga alohida e’tibor qaratildi.Mazkur ikki tadbir BMT faoliyatining o‘zaro bog‘liq yo‘nalishlarini xalqaro tinchlik va xavfsizlikni ta’minlashga qaratilgan institutsional mexanizmlar hamda barqaror rivojlanish sohasidagi global va mahalliy tashabbuslarni amaliy jihatdan o‘rganish imkonini berdi. S. Usmanovaning mazkur tadbirlardagi ishtiroki xalqaro tashkilotlar faoliyatiga oid amaliy tajribani o‘rganish, xalqaro huquq ta’limida nazariya va amaliyot uyg‘unligini ta’minlash, shuningdek, olingan bilim va kuzatuvlarni JIDUning ilmiy-tadqiqot hamda ta’lim jarayonlariga tatbiq etishga xizmat qiladi.
2026-yil 2-noyabr kuni Jahon iqtisodiyoti va diplomatiya universitetida “Alumni Talk: From UWED to Ajou University” mavzusida bitiruvchilar bilan uchrashuv tashkil etildi. Tadbirda JIDU hamda Janubiy Koreyaning Ajou universiteti (Ajou University) bitiruvchisi, Das Team media va konsalting agentligi asoschisi, “160-manzil” loyihasi muallifi Olimjon Obidov ishtirok etdi. Uchrashuv davomida talabalar Janubiy Koreyada ta’lim olish imkoniyatlari, Ajou universitetiga kirish tartibi, xalqaro ta’lim dasturlariga tayyorgarlik ko‘rish hamda xorijda tahsil olish jarayonining o‘ziga xos jihatlari haqida ma’lumot oldilar. Shuningdek, tadbir doirasida talabalik davrida ko‘p uchraydigan xatolarni cheklab o‘tish, shaxsiy salohiyatni rivojlantirish va kelgusi kasbiy faoliyatni samarali rejalashtirish masalalari muhokama qilindi. Olimjon Obidov o‘zining ta’lim va kasbiy faoliyati davomida orttirgan tajribasi bilan o‘rtoqlashib, talabalarga amaliy tavsiyalar berdi. Mazkur uchrashuv universitetda ta’lim sifati va mazmunini takomillashtirish, talabalarning xalqaro ta’lim imkoniyatlari to‘g‘risidagi xabardorligini oshirish, shuningdek, bitiruvchilarning amaliy tajribasini yosh avlodga yetkazishga qaratilgan tashabbuslarning ahamiyatini namoyon etdi. Bunday muloqotlar talabalarning mustaqil fikrlashi, zamonaviy bilim va ko‘nikmalarni egallashi, xalqaro tajribani o‘rganishi hamda mehnat bozori talablariga mos, raqobatbardosh mutaxassislar sifatida shakllanishiga xizmat qiladi.
Jahon iqtisodiyoti va diplomatiya universiteti "Xalqaro munosabatlar" fakulteti talabalari uchun qadimiy va betakror Buxoro shahriga ma’rifiy-tanishuv tashrifi tashkil etildi. Mazkur tashrifdan asosiy maqsad talabalarning tarixiy va madaniy bilimlarini boyitish, milliy qadriyatlarimiz va boy tarixiy merosimizga bo‘lgan hurmatini oshirish, shuningdek, yosh avlodda vatanparvarlik, milliy o‘zlikni anglash va tarixiy xotiraga sadoqat tuyg‘ularini mustahkamlashdan iborat. Tashrif davomida talabalar Buxoroning ko‘p asrlik tarixidan hikoya qiluvchi me’moriy obidalar, tarixiy yodgorliklar va diqqatga sazovor maskanlar bilan yaqindan tanishdilar. Shuningdek, shaharning boy madaniy merosi, o‘ziga xos me’morchilik an’analari hamda xalqimizning milliy urf-odatlari haqida qimmatli ma’lumotlarga ega bo‘ldilar. Ayniqsa, Buxoroning jahon sivilizatsiyasi va ilm-fani rivojiga qo‘shgan hissasi, Buyuk ipak yo‘li tarixidagi o‘rni hamda xalqaro madaniy aloqalar taraqqiyotidagi ahamiyati talabalar uchun alohida qiziqish uyg‘otdi.Bunday ma’rifiy safarlar talabalarning dunyoqarashini kengaytirish, nazariy bilimlarini hayotiy taassurotlar bilan boyitish hamda kelajakdagi xalqaro munosabatlar sohasi mutaxassislari sifatida tarixiy va madaniy merosni chuqur anglashlariga xizmat qiladi. JIDU talabalari uchun tashkil etilgan mazkur tashrif nafaqat unutilmas taassurotlar, balki yangi bilim va ma’naviy tajribalar manbai bo‘ldi.
Jahon iqtisodiyoti va diplomatiya universitetida talaba-yoshlarning kitobxonlik madaniyatini yuksaltirish, milliy adabiy merosga qiziqishini oshirish hamda psixologik kompetensiyalarini rivojlantirish maqsadida “Bibliopsixologiya: klassika, tafakkur va inson ruhiyati” mavzusida intellektual-psixologik va ijodiy ko‘rik-tanlov tashkil etildi. Tadbir universitet psixologi N. Norova hamda kurs koordinatorlari hamkorligida o‘tkazilib, adabiyot va psixologiya uyg‘unligi orqali talabalarning mustaqil fikrlashi, tahliliy tafakkuri, ijodiy salohiyati va shaxsiy rivojlanishini qo‘llab-quvvatlashga yo‘naltirildi. Ko‘rik-tanlov davomida ishtirokchilar badiiy asarlarning mazmun-mohiyati, adabiy qahramonlarning xarakter xususiyatlari, ruhiy kechinmalari va xulq-atvor motivlarini psixologik nuqtayi nazardan tahlil qildilar. Shuningdek, klassik adabiyotga oid bilimlarini namoyish etish, badiiy obrazlarni sahnaviy talqin qilish, tanqidiy fikrlash hamda adabiy xulosalarni hayotiy vaziyatlar bilan bog‘lashga qaratilgan ijodiy shartlarda faol ishtirok etdilar. Tadbirning psixologik yo‘nalishi doirasida empatiya, hissiy intellekt, samarali muloqot, tanqidiy fikrlash va jamoaviy hamkorlik ko‘nikmalarini rivojlantirishga alohida e’tibor qaratildi. Badiiy adabiyotning inson ruhiyatini anglash, shaxsiy dunyoqarashni kengaytirish va ijtimoiy munosabatlarda ongli yondashuvni shakllantirishdagi ahamiyati yoritildi. Ko‘rik-tanlov yakunida faol ishtirok etgan talabalar sertifikatlar va esdalik sovg‘alari bilan taqdirlandi. Mazkur seminar-trening talabalarning kitobxonlik madaniyati va psixologik savodxonligini mustahkamlash, intellektual salohiyati, ijodiy tafakkuri hamda shaxsiy kompetensiyalarini rivojlantirishga xizmat qiluvchi ta’limiy-tarbiyaviy va psixologik faoliyatning muhim yo‘nalishlaridan biridir.
2026-yil 31-oktabr kuni Jahon iqtisodiyoti va diplomatiya universitetida Kanadaning O‘zbekiston Respublikasidagi Favqulodda va Muxtor Elchisi Kristofer Dagganning xalqaro munosabatlardagi zamonaviy chaqiriqlar, global muammolar hamda diplomatik kasbning o‘ziga xos xususiyatlariga bag‘ishlangan ma’ruzasi bo‘lib o‘tdi. Ma’ruza talabalar bilan ochiq muloqotga asoslangan interaktiv formatda o‘tdi. Diplomat ma’lumotlarni an’anaviy tarzda bayon qilish o‘rniga, savollar berish, turli nuqtai nazarlarni tinglash va auditoriyani bahs-munozaraga jalb etish orqali ishtirokchilarga dolzarb xalqaro jarayonlarni birgalikda tahlil qilishni taklif etdi. Uchrashuv avvalida Elchi talabalarni zamonaviy dunyo qanchalik o‘zgargani va xalqaro hamjamiyat qanday inqirozlarga duch kelayotgani haqida mulohaza yuritishga chorladi. Muhokama davomida talabalar hozirgi xalqaro vaziyatni dunyoning turli mintaqalarida bir vaqtning o‘zida bir nechta o‘zaro bog‘liq inqirozlar avj olayotgan, bu esa global beqarorlikni kuchaytirib, xalqaro munosabatlarni murakkablashtirayotgan “polikrizis” holati sifatida ta’rifladilar. Diplomatik kasbga alohida e’tibor qaratildi. Elchi o‘z kasbiy tajribasiga tayanib, muvaffaqiyatli diplomatik karyera qurish uchun zarur bo‘lgan shaxsiy fazilatlar va kasbiy salohiyat haqida so‘zlab berdi. Muhokama chog‘ida talabalar shiddat bilan o‘zgarayotgan xalqaro muhitda diplomatning o‘rni haqida fikr yuritish imkoniga ega bo‘ldilar. Ma’ruzaning interaktiv ruhda o‘tgani talabalarga nafaqat amaldagi diplomat bilan fikr almashish, balki tanqidiy fikrlash, xalqaro voqealarni tahlil qilish va o‘z nuqtai nazarini asosli bayon etish mahoratini namoyish etish imkonini berdi. Uchrashuv kasbiy muloqot uchun muhim maydon bo‘lib, talabalarning zamonaviy xalqaro munosabatlar, global chaqiriqlar va diplomatik faoliyatning amaliy jihatlari haqidagi tasavvurlarini boyitishga xizmat qildi.
2026-yil 31-oktyabr kuni “Turkiston” san’at saroyida Hindistonning asosiy milliy chiroqlar bayrami — “Diwali-2026”ga bag‘ishlangan tantanali tadbir bo‘lib o‘tdi. Madaniy dasturda Jahon iqtisodiyoti va diplomatiya universitetining “Xalqaro munosabatlar” hamda “Xalqaro huquq” fakultetlarida o‘qituvchi Bernara Mansurovna Giyazova rahbarligida hind tilini o‘rganayotgan 3- va 4-bosqich talabalari faol ishtirok etdi. JIDU talabalari yuksak sahna mahorati, til bilimi hamda Hindiston an’analariga bo‘lgan hurmatini namoyish etdi. Yosh diplomatlarning chiqishlari yuqori baholanib, mehmonlarning samimiy e’tirofiga sazovor bo‘ldi. Bunday tadbirlarda ishtirok etish talabalarga tili o‘rganilayotgan mamlakatning qadriyatlari va merosi bilan yanada yaqinroq tanishish imkonini beradi. Mazkur tadbir madaniy diplomatiya ikki tomonlama aloqalarni mustahkamlash va yoshlar o‘rtasidagi hamkorlikni rivojlantirishning samarali vositasi ekanini yana bir bor namoyon etdi.
