“Xalqaro iqtisodiy munosabatlar” fakulteti 1995-yil 23-oktyabrda tashkil topgan. Fakultetning asosiy vazifasi – Tashqi Ishlar Vazirligi, Tashqi iqtisodiy aloqalar, investitsiya va savdo vazirligi shuningdek chet el elchixonalari va chet el bilan hamkorlikda ish olib boradigan Respublikamizning barcha tashkilotlariga yuqori malakali kadrlar tayyorlash.

“Xalqaro iqtisodiy munosabatlar” fakulteti ilk kunlaridanoq Xalqaro iqtisodiy munosabatlar va jahon iqtisodiyoti yo’nalishlari bo’yicha bakalavrlar tayyorlab kelmoqda. 2000-yilda magistratura tashkil etilib, 2015-yildan boshlab fakultetda “Jahon iqtisodiyoti” va “Tashqi iqtisodiy faoliyat” yo’nalishlari bo’yicha magistrlar tayyorlanib kelmoqda.

Hozirgi kunda “Xalqaro iqtisodiy munosabatlar” fakulteti Respublikada iqtisodiy fanlar bo’yicha kadrlarni yetkazib beruvchi yetakchi fakultetlardan biri hisoblanadi.

Ta’lim yo’nalishi

“Jahon iqtisodiyoti va Xalqaro iqtisodiy munosabatlar” yo’nalishidagi bakalavr quyidagi fundamental va maxsus tayyorlov ko’rinishadagi professional faoliyatlarni amalga oshira oladi:

  • amaliy faoliyatlar doirasida: Tashqi ishlar vazirligida attashe, referent va inspektor, Tashqi iqtisodiy aloqalar, investitsiya va savdo vazirligida iqtisodchi ekspert, qo’shma korxonalarda xalqaro iqtisodchi, menejer va marketolog;
  • tashkiliy-boshqaruv faoliyatlari doirasida: qimmatbaho qog’ozlar mutaxassisi, moliyaviy va bankka oid tashkilotlar dilleri, buxgalter, auditor;
  • ilmiy tadqiqot ishlari doirasida: zamonaviy xalqaro iqtisodiy munosabatlar bo’yicha asosiy muammolarni o’rganishga oid materiallarni tahlil qilish va tayyorlash.

O’qitish uslublari

O’qitish jarayonida eng samarali zamonaviy pedagogic texnologiyalar, shuningdek an’anaviy uslublardan foydalaniladi. Darslar Respublikaning malakali mutaxassislari va professor-o’qituvchilari tomonidan olib boriladi. O’qitish uslublari:

  • o’qitish jarayonida: har taraflama debatlar, “o’qituvchi-student” uslubidagi ma’ruzalar, masofaviy onlayn ma’ruzalar va prezentatsiyalar.
  • baholash tizimida: uch tomonlama monitoring, modulli baholash tizimi;
  • elektron kutubxona va resurs markazi yordamida.

Bitiruvchilar

Fakultet tashkil topganidan buyon “Jahon iqtisodiyoti” va “Xalqaro iqtisodiy munosabatlar” yo’nalishi bo’yicha 1000 dan ortiq mutaxassislar tayyorlangan.

Ushbu o’quv yilida magistratura yo’nalishida 39 ta, bakalavriatura yo’nalishi bo’yicha 467 ta student tahsil olmoqda. Ushbu sohaning asosiy fanlari: Jahon iqtisodiyoti, xalqaro iqtisodiy munosabatlar, xalqaro iqtisodiy integratsiya, moliya, xalqaro valyuta-kredit munosabatlari, xalqaro biznes strategiyalari, strategik menejment, marketing.

Ushbu yo’nalishlar doirasida quyidagi tashkilotlar uchun maxsus tayyorlov ko’zda tutiladi: diplomatik va tashqi iqtisodiy faoliyat olib boradigan davlat  maussasalari, xalqaro hukumatlararo va nodavlat tashkilotlar, xalqaro moliyaviy institut va bank muassasalari hukumati, shuningdek tashqi savdo faoliyatini olib boradigan tashkilotlar va kompaniyalar.