“Amaliy diplomatiya” kafedrasi 2005 yil avgustida «Diplomatik kurslar» markazi negizida tashkil etilgan bo‘lib, unga iqtisod fanlari doktori, Favqulodda va muxtor elchi Mavlonov Ibragim Radjabovich rahbarlik qilmoqda. Kafedrada “O‘zbekiston Respublikasi tashqi siyosati”, “Hozirgi zamon diplomatiyasi”, “Diplomatiya tarixi”, “Diplomatiya asoslari”, “Diplomatik muzokaralar”, “Diplomatik va konsullik xizmati”, “Iqtisodiy diplomatiya”, “Amaliy diplomatiya”, “Xalqaro protokol va etiket” kabi fanlardan ta'lim beriladi.

Kafedra o‘qituvchilari o‘zlarining faoliyatlarida internet, multimedia va boshqa zamonaviy informatsion texnologiyalaridan keng foydalanadilar. Xususan, kafedra professor-o‘qituvchilari tomonidan bir qator ma'ruza va amaliy mashg‘ulotlarining prezentatsion shakli yaratildi. «Xalqaro munosabatlar va diplomatiya psixologiyasi» fani bo‘yicha darsga oid vazifalarni www.livejournal.ru virtual sahifasi orqali qabul qilish yo‘lga qo‘yilgan bo‘lib, internet orqali interaktiv o‘quv uslublari, simulyatsiya o‘yinlaridan foydalaniladi. Buning natijasida joriy va oraliq reyting nazoratlarining yangi uslublari yaratildi va joriy etildi. Kafedrada o‘qitiladigan fanlar bo‘yicha prezentatsion, tarqatma, video va boshqa ko‘rgazma materiallari mavjud bo‘lib, ulardan ma'ruza, seminar va amaliy mashg‘ulotlarda foydalaniladi.

Ayni paytda kafedra Moskva Davlat xalqaro munosabatlar instituti, Yaponiyaning “Japan Foundation” jamg‘armasi bilan aloqalar o‘rnatgan.